இசையுலகின் மிகவும் உயரிய விருதாகக் கருதப்படும் கிராமி விருது வழங்கும் விழா அமெரிக்காவில் உள்ள லொஸ் ஏஞ்சல்ஸ் நகரில் கடந்த 12ம் திகதி நடைபெற்றது.
59வது ஆண்டு கிராமி விருது வழங்கல் விழாவில் பரிந்துரைக்கப்பட்ட 5 பிரிவுகளின் கீழ், பிரிட்டனைச் சேர்ந்த பிரபல பாடகியான அடேல் அனைத்து விருதுகளையும் வென்றார்.
கடந்த ஆண்டின் சிறந்த இசை அல்பம், சிறந்த இசைத்தட்டு, சிறந்த பாடல், சிறந்த பாப் பாடகி, சிறந்த பாப் பாடல் அல்பம் ஆகிய ஐந்து விருதுகளையும் இவர் பெற்றார்.
அடேலின் இசை அல்பத்துடன் போட்டியிட்ட பிரபல அமெரிக்க பாடகியான பெயான்ஸ் பாடியிருந்த ‘லெமனேட்’ என்னும் ஆல்பம் 9 பிரிவுகளின் கீழ் கிராமி விருதுகளுக்குப் பரிந்துரைக்கப்பட்டிருந்தது.
எனினும், பாரம்பரிய இசை மற்றும் சிறந்த வீடியோ அல்பம் ஆகிய இரு கிராமி விருதுகளையே ‘லெமனேட்’ வென்றது.
அடேலுடன் போட்டியிட்ட பிரபல பாடகி பெயான்ஸ், விருதுக்கான வாய்ப்பை இழந்தபோதும், விழா மேடையில் தனது இசை மழையால் ரசிகர்களை மகிழ்வித்தார்.
ஐந்து விருதுகளை வென்று வெற்றிக்களிப்பில் மகிழ்ந்த அடேல், தனது ஏற்புரையின்போது பெயான்ஸை வெகுவாகப் புகழ்ந்து, பாராட்டிப் பேசினார்.
பின்னர், திடீரென்று உணர்ச்சிவசப்பட்டவராக ஒரு கிராமி விருதை இரண்டாக உடைத்து, இந்த பாதி பெயான்ஸூக்கு சேர வேண்டியதாகும், என்று ஒரு துண்டை பெயான்ஸூக்கு அளித்தபோது அரங்கத்தில் இருந்த நடுவர்கள் மற்றும் ரசிகர்கள் நெகிழ்ந்துபோய் பலத்த கரவொலி எழுப்பி, ஆரவாரம் செய்தனர்.
