தேனீக்களை தாடியாக வைத்திருப்பதில் புதிய கின்னஸ் வரலாற்று சாதனையை கனடாவைச் சேர்ந்த ஜூவான் கார்லோஸ் நோகுஸ் ஆர்டிஸ் படைத்துள்ளார்.
தேனீக்களை தாடியாக வைத்திருந்த முந்தைய நேர பதிவைவிட 8 நிமிடங்கள் அதிகமாக தேனீக்களை தாடியாக வைத்திருந்து அவர் இந்த புதிய சாதனையை உருவாக்கியுள்ளார்.
ஒன்டாரியோ மாகாணத்தில் தேனீ பண்ணை ஒன்றில் வேலை செய்யும் ஜூவான் கார்லோஸ் நோகுஸ் ஆர்டிஸ், சரியாக 61 நிமிடங்கள் தன்னுடைய முகத்தில் தேனீக்களை தாடியாக வைத்திருந்தார்.
“மென்மையானவை” என்று விபரிக்கப்படும் ஒரு இலட்சம் தேனீக்களை இதற்காக அந்த தேனிப்பண்ணை வழங்கியிருந்தது.
தேனீக்கள் இரண்டு முறை கொட்டியபோதும் அமைதியாக இருந்த ஆர்டிஸ், முந்தைய சாதனையை முறியடித்த பின்னர் தேனீக்களை விரட்டிவிடும் வரை அசையாமல் அமர்ந்திருந்தார்.
இந்த சாதனை-முறியடிப்பு முயற்சியில் ஈடுபடும் முன் இருமுறை மட்டுமே இதில் பயிற்சி எடுத்திருக்கும் ஆர்டிஸ், தான் இந்த தேனீ தாடி வைத்துக்கொள்ளும் கலையில் இன்னும் ஒரு புதுமுகம் தான் என்று கூறியுள்ளார்.
