நியூஸிலாந்துக்கு எதிரான ஏழாவதும் இறுதியுமான ஒருநாள் போட்டியில் இலங்கை அணி 34 ஓட்டங்களால் வெற்றி பெற்றுள்ளது.
நியூஸிலாந்து மற்றும் அவுஸ்திரேலியாவுக்கு சுற்றுப் பயணம் செய்துள்ள இலங்கை இரண்டு டெஸ்ட் மற்றும் ஏழு ஒருநாள் போட்டிகளில் நியூஸிலாந்தை எதிர்கொள்கின்றது.
முன்னதாக நடைபெற்று முடிந்த டெஸ்ட் போட்டிகளில், இரண்டிலும் நியூஸிலாந்து வெற்றி பெற்று தொடரைக் கைப்பற்றியது.
இரு அணிகளுக்கும் இடையிலான ஒருநாள் தொடரில் முன்னதாக இடம்பெற்ற ஆறு போட்டிகளில் ஒன்று கைவிடப்பட்ட நிலையில், நான்கில் நியூஸிலாந்தும் ஒன்றில் இலங்கையும் வெற்றி பெற்றிருந்தன.
இதன்படி 4-1 என நியூஸிலாந்து ஒருநாள் தொடரையும் வசப்படுத்தியுள்ள நிலையில் 7வதும் இறுதியுமான போட்டி இன்று நடைபெற்றது. இதில் நாணய சுழற்சியில் வென்ற இலங்கை அணி முதலில் துடுப்பெடுத்தாடத் தீர்மானித்தது.
இதன்படி 50 ஓவர்கள் நிறைவில் 6 விக்கெட்டுக்களை இழந்த இலங்கை அணி 287 ஓட்டங்களைக் குவித்துள்ளது.
இலங்கை சார்பாக அதிரடியாக ஆடிய குமார் சங்கக்கார 113 ஓட்டங்களைப் பெற்றார். அத்துடன் டில்ஷான் 81 ஓட்டங்களை விளாசியுள்ளார்.
இதன்படி 288 என்ற இலக்கை நோக்கி துடுப்பெடுத்தாடிய நியூஸிலாந்து அணி 45.2 ஓவர்களில் 253 ஓட்டங்களுக்கு சகல விக்கட்டுகளையும் இழந்து 34 ஓட்டங்களால் தோல்வியைத் தழுவியது.
அவ் அணி சார்பாக வில்லியம்சன் 54 ஓட்டங்களையும், ராஞ்சி 47 ஓட்டங்களையும் பெற்றுக்கொண்டனர். இலங்கை அணி சார்பாக நுவான் குலசேகர, சமிந்த எரங்க, சமீர ஆகியோர் தலா இரு விக்கட்டுகளை கைப்பற்றினர்.
இன்றைய போட்டியின் நாயகனாக குமார் சங்ககாரவும் தொடரின் நாயகனாக வில்லியம்சனும் தெரிவுசெய்யப்பட்டனர்.
