தேசியப் பிரச்சினைகளுக்கு தீர்வுகாணும் வகையில் தேசிய நலன்களை அடிப்படையாகக் கொண்ட அரசியல் அமைப்புச் சட்டமொன்று உருவாக்கப்படுமானால் பிரதான எதிர்க்கட்சி என்ற ரீதியில் தமிழ்த் தேசியக் கூட்டமைப்பு ஒத்துழைப்புக்களை வழங்கும் என்று கூட்டமைப்பின் யாழ்.மாவட்ட பாராளுமன்ற உறுப்பினர் எம்.ஏ. சுமந்திரன் தெரிவித்தார்.
புதிய பாராளுமன்றத்தின் இரண்டாவது நாள் அமர்வில் பிரதமரால் முன்வைக்கப்பட்ட தேசிய அரசாங்கத்தில் அமைச்சரவையின் எண்ணிக்கையை அதிகரித்துக் கொள்வதற்கான அங்கீகாரத்தைப் பெறும் பிரேரணை மீதான விவாதத்தில் கலந்து கொண்டு உரையாற்றுகையிலேயே அவர் மேற்கண்டவாறு தெரிவித்தார்.
சுமந்திரன் எம்.பி. இங்கு மேலும் கூறுகையில், 1977 ஆம் ஆண்டிற்குப் பின்னர் தற்போது தமிழ்த் தேசியக் கூட்டமைப்பின் சார்பில் எமது தலைவர் இரா. சம்பந்தன் இரண்டாவது தமிழர் எதிர்க்கட்சி தலைவர் பதவிக்கு நியமிக்கப்பட்டுள்ளார். அவருக்கு எமது நல்வாழ்த்துக்களை தெரிவித்துக் கொள்கின்றோம்.
1977 ஆம் ஆண்டு ஜூலை மாதம் அமிர்தலிங்கம் எதிர்க்கட்சித் தலைவராக நியமனம் பெற்றார். அந்தவரிசையில் 1983 இல் கொண்டு வரப்பட்டதான அரசியல் அமைப்பில் ஆறாவது திருத்தச் சட்டத்தின் துரதிர்ஷ்ட வசத்தால் 1983 காலப்பகுதியில் இரா. சம்பந்தன் பாராளுமன்ற பிரதிநிதி என்ற அந்தஸ்தினை இழந்தார். அதிலிருந்து மீண்டும் அவர் எதிர்க்கட்சித் தலைவராக உயர்ந்துள்ளார். இது நாட்டிற்கும் நல்ல சகுனமாக அமைந்திருக்கின்றது.
தேசிய கட்சிகள் இணைந்து தேசிய அரசா ங்கத்தை நிறுவியுள்ளன. தேசிய அரசாங்கம் தொடர்பில் உரையாற்றியோர் தமிழ் மக்க ளின் தேசியப் பிரச்சினைக்கு தீர்வுகாணப்பட வேண்டும் என்றே வலியுறுத்தினர். இரு தரப்பினரும் இதனையே பேசினர். இது செயற்படுத்தப்பட வேண்டும் என்றார்.
