தென் ஆப்பிரிக்காவுக்கு எதிரான இரண்டாவது டெஸ்ட் போட்டியில் இலங்கை வெற்றி பெற்றதோடு டெஸ்ட் தொடரையும் 2-0 என்ற கணக்கில் கைப்பற்றியுள்ளது.
இலங்கையில் சுற்றுப்பயணம் செய்து விளையாடி வருகிறது தென் ஆப்பிரிக்கா அணி. இரு அணிகளுக்கு இடையிலான முதலாவது டெஸ்ட் போட்டியில் இலங்கை வெற்றி பெற்றது.
இந்நிலையில் கொழும்பில் நடந்து வந்த இரண்டாவது டெஸ்டின் முதல் இன்னிங்சில் இலங்கை 338 ஓட்டங்களும், தென் ஆப்பிரிக்க 124 ஓட்டங்களும் எடுத்தன.
214 ஓட்டங்கள் முன்னிலையுடன் இரண்டாவது இன்னிங்சை தொடங்கிய இலங்கை அணி 5 விக்கெட்கள் இழப்புக்கு 275 ஓட்டங்கள் எடுத்து டிக்ளேர் செய்தது.
அந்த அணியின் கருணரத்னே 85 ஓட்டங்களும், மத்யூஸ் 71 ஓட்டங்களும், குணத்திலக 61 ஓட்டங்களும் எடுத்தனர்.
இதையடுத்து 490 ஓட்டங்கள் எடுத்தால் வெற்றி பெறலாம் என்ற இலக்குடன் விளையாடிய தென் ஆப்பிரிக்கா இலங்கை பந்துவீச்சை சமாளிக்க முடியாமல் 290 ஓட்டங்களுக்கு ஆல் அவுட் ஆனது.
இலங்கை அணி சார்பில் ரங்கனா ஹெரத் 6 விக்கெட்களை வீழ்த்தினார்.
இதன் மூலம் இலங்கை அணி 199 ஓட்டங்கள் வித்தியாசத்தில் வெற்றி பெற்றதோடு தொடரையும் 2-0 என்ற கணக்கில் கைப்பற்றியுள்ளது.
