பகவான் ஸ்ரீ சத்ய சாயி பாபாவின் 93 வது அவதார தினத்தினை முன்னிட்டு வவுனியா பகவான் ஸ்ரீ சத்ய சாயி சேவா நிலையம் இன்று சனிக்கிழமை(17.11) வவுனியா பிரதேச செயலக பிரிவிற்குட்பட்ட பாலமோட்டை நவ்வி குஞ்சுக்குளம் ஆகிய கிராம மக்கள் பயன்பெறும் வகையில் வவுனியா நவ்வி ஸ்ரீவாயி வித்தியாலயத்தில் இலவச மருத்துவ முகாம் ஒன்றினை நடாத்தியுள்ளது.
இவ் வைத்திய முகாமில் பொது மருத்துவ முகாம், நிபுணத்துவ மருத்துவ சேவை, கண் பரிசோதனையும் கண்ணாடி வழங்கலும், காது, மூக்கு, தொண்டை நோய்களுக்கான சிகிச்சை பற் சிகிச்சை, சித்த வைத்திய முகாம், தொற்றா நோய்களை இனம்கானும் குருதிப் பரிசோதனை இடம்பெற்றது. அத்துடன் முன்பள்ளி மாணவர்கள் 22பேருக்கு கற்றல் உபகரணங்கள் வழங்கப்பட்டது.
கண் வைத்திய முகாமின் மூலம் 225 பேரும் பற்சிகிச்சை மூலம் 54 பேரும் பொது வைத்திய முகாமின் மூலம் 270 பேரும் சித்த வைத்திய முகாம் மூலம் 115 பேரும் மொத்தமாக 664 பேர் இலவச வைத்திய முகாம் மூலம் பயன் பெற்றுக்கொண்டனர்.
பிராந்திய சுகாதார சேவைகள் உத்தியோகத்தர்கள், வவுனியா பொது வைத்தியசாலை வைத்தியர்கள், தாதியர்கள், ஊழியர்கள், சென்யூரி தாதியர் பயிற்சி கல்லூரி மற்றும் விசன்கெயார் நிறுவன உத்தியோகத்தர்களும் என பல நிறுவனங்கள் கலந்துகொண்டிருந்தமை குறிப்பிடத்தக்கது.
