பெருமூளை வாதம் குறித்த விழிப்புணர்ச்சியை ஏற்படுத்தும் பொருட்டு, 15 வயது சிறுவன், அந்நோயால் பாதிக்கப்பட்ட தனது தம்பியை முதுகில் சுமந்து 57 மைல் தூரம் விழிப்புணர்வு நடைபயணம் மேற்கொண்டுள்ளான்.
அமெரிக்காவை சேர்ந்த ஹண்டர் காண்டி(15) என்ற சிறுவன், கடந்த 5 ஆம் திகதி, மிச்சிகன் மாகாணம், லேம்பர்ட்வில்லேயில் இருந்து தனது தம்பியை முதுகில் சுமந்து நடைபயணத்தை தொடங்கினான். நேற்று மாலை 4 மணியளவில் 57 மைல் தூரத்தில் உள்ள ஆன் ஆர்பர் நகரை வந்தடைந்தான்.
அங்குள்ள மிச்சிகன் பல்கலைக்கழகத்துக்கு வந்து சேர்ந்த காண்டியை, நண்பர்கள் மற்றும் குடும்பத்தினர் கட்டித்தழுவி வரவேற்று பாராட்டினர்.
இந்த நடைபயணத்தில் பிராண்டன் பள்ளியில் மாற்று திறனாளிகள் விளையாடும் மைதானத்துக்காக 2 லட்சம் டொலர் நிதியுதவி செய்யுமாறு காண்டி கோரிக்கை வைத்துள்ளான்.
நடைபயணத்தின் முடிவில் பேசிய காண்டி, நிதி திரட்டுவதற்காக மட்டும் நான் இந்த நடைபயணத்தை மேற்கொள்ளவில்லை. இந்நோயின் தீவிரத்தை உணர்த்துவதற்காகவே நடைபயணம் மேற்கொண்டுள்ளேன் என்று கூறியுள்ளான்.
