எர்ணாகுளம் அருகே அங்கமாலியில் திருடச் சென்ற வீட்டில் அசதி காரணமாக தூங்கிய திருடனை அப்பகுதியினர் பிடித்து போலீசில் ஒப்படைத்தனர். எர்ணாகுளம் அருகே உள்ள அங்கமாலி பகுதியை சேர்ந்த விஸ்வம்பரன்.
கடந்த சில தினங்களுக்கு முன் வீட்டை பூட்டிவிட்டு வெளியூர் சென்றிருந்தார். ஒரு வாரம் கழித்த பின்னரே திரும்புவோம் என பக்கத்து வீட்டினரிடம் கூறியிருந்தார். இந்நிலையில் நேற்று அதிகாலை 4 மணியளவில் விஸ்வம்பரனின் வீட்டில் ஒருவர் படுத்து தூங்கிக் கொண்டிருப்பதை பக்கத்து வீட்டினர் கவனித்தனர்.
சந்தேகமடைந்த பக்கத்து வீட்டினர் அப்பகுதியைச் சேர்ந்த மேலும் சிலரை அழைத்துக் கொண்டு அவரை தட்டி எழுப்பினர். திடுக்கிட்டு எழுந்த அந்த நபர் தப்பி ஓட முயன்றார். இதையடுத்து,அப்பகுதியினர் அவரை மடக்கிப் பிடித்து விசாரித்தனர்.
இதில், அந்த நபர் ஐயம்புழா பகுதியை சேர்ந்த கிரீஷ் (35) என்பது தெரிய வந்தது. அவரிடம் விசாரித்த போது கடந்த பல மாதங்களாக அப்பகுதியில் திருடியதால் எனக்கு அலுப்பாக இருந்தது. விஸ்வம்பரனின் வீட்டில் ஆள் இல்லை என தெரிந்துதான் உள்ளே வந்தேன். பல நாட்கள் தூங்காமல் கண் விழித்த அசதி காரணமாக தூங்கிவிட்டேன் என்றார்.
இதையடுத்து, அவரை அங்கமாலி போலீசில் ஒப்படைத்தனர். போலீசார் விசாரணையில் அங்கமாலி பகுதியில் கடந்த பல மாதங்களில் 10க்கும் மேற்பட்ட வீடுகளில் கிரீஷ் திருடியது தெரியவந்தது. விசாரணைக்குப் பின் அவரை எர்ணாகுளம் நீதிமன்றத்தில் ஆஜர்படுத்தி சிறையில் அடைத்தனர்.
