வவுனியா நவீன சந்தையில் மக்களின் நடமாட்டத்திற்கு இடைஞ்சல் ஏற்படக்கூடிய வகையிலும் சுகாதார சீர்கேடான முறையிலும் வியாபரத்தில் ஈடுபட்டவர்களின் பொருட்களை நேற்று காலை (30.8) வவுனியா நகரசபையினர் அகற்றியபோது நவீன சந்தை வியாபாரிகள் கடைகளை பூட்டி தமது எதிர்ப்பை தெரிவத்தனர்.
இச் சம்பவம் தொடர்பாக வியாபாரிகள் கருத்து தெரிவிக்கையில்
நவீன சந்தைப்பகுதியியல் நடை பாதையில் மரக்கறிகள் வைத்து விற்கப்படுவதாக தெரிவித்த நகரசபையினர் நாம் கடைகளை திறப்பதற்கு முன்னராக வந்து எமது பொருட்களை நகரசபையின் உழவு இயந்திரத்தில் ஏற்றி சென்று விட்டனர். எனவே அவ்வாறான சம்பவத்திற்கு எதிர்ப்பு தெரிவித்தே நாம் இச் செயற்பாட்டில் ஈடுபட்டோம் என தெரிவித்தனர்.
இது தொடர்பில் வவுனியா நகரசபையின் பொது சுகாதார பரிசோதகர் தெரிவித்தபோது..
வவுனியா நவீன சந்தைப்பகுதியில் வர்த்தக நிலையங்களை வைத்துள்ளவர்கள் தமது கடைகளுக்கு வெளியில் நடை பாதையில் வைத்து வியாபாரத்தல் ஈடுபடுவதனால் பொது மக்களின் நடமாட்டத்திற்கு இடையூறு ஏற்படுவதுடன் அவர்கள் மரக்கறிகளை அவ்விடத்தில் வைத்து துப்பரவு செய்து வருவதனாலும் கழிவுப்பொருட்கள் தேங்கி நின்று சுகாதார சீர் கேடுகள் ஏற்படுகின்றது.
அத்துடன் எமது நகரசபை சுகாதார தொழிலாளிகள் நவீன சந்தைத் தொகுதியை துப்பரவு செய்யமுடியாத வகையில் வர்த்தக நிலையங்களுக்கு வெளியில் ஒவ்வொரு வர்த்தக நிலையத்தினரும் பொருட்களை சேகரித்து வைத்துள்ளமையினால் பெரும் சிரமங்களை எதிர்கொண்டு வருகின்றனர்.
எனவே நாம் பல தடவை இவ் வர்த்தகர்களுக்கு இது தொடர்பில் அறிவுறுத்தல் வழங்கியிருந்ததுடன் நேற்றைய தினமும் இது தொடர்பில் நடவடிக்கை எடுப்போம் என அறிவுறுத்தல் வழங்கினோம்.
எனினும் அவர்கள் இவ் அறிவுறுத்தலை செவிசாய்க்காததால் நாம் அதிகாலையில் வர்த்தக நிலையங்களுக்கு முன்னால் உள்ள பொருட்களை அகற்ற வேண்டிய தேவை ஏற்பட்டது என தெரிவித்தார்.
இதேவேளை வியபாரிகளின் எதிர்ப்பு நடவடிக்கை இடம்பெற்ற பகுதிக்கு வருகை தந்த வவுனியா பொலிஸ் நிலைய பொறுப்பதிகாரி மற்றும் வவுனியா நகரசபை பொது சுகாதார பரிசோதகர் ஆகியோர் பறிமுதல் செய்யப்பட்ட பொருட்களை இம் முறை வழங்குவதற்கு ஏற்பாடு செய்வதாகவும் இன்றில் இருந்து வர்த்தக நிலையத்திற்கு முன்னால் மஞ்சல் நிறத்திலான கோடு கீறப்பட்டு அதற்குள் வைத்தே வியாபாரம் செய்யப்படவேண்டும் எனவும் அறிவுறுத்தல் வழங்கியதுடன் ஒரு மாத காலத்தினுள் வர்த்தக நிலையத்திற்குள் மாத்திரம் வியாபாரம் செய்வதற்கு நடவடிக்கை எடுக்க வேண்டும் எனவும் தெரிவத்திருந்ததை வர்த்கர்கள் ஏற்றுக்கொண்டதன் அடிப்படையில் எதிர்ப்பு நடவடிக்கை கைவிடப்பட்டு நவீன சந்தை தெகுதி திறக்கப்பட்டு வியபாரம் மேற்கொள்ளப்பட்டது.
