சிலி நாட்டின் பொருளாதார அமைச்சருக்கு வர்த்தகர்களின் சங்கமொன்றினால் பாலியல் பொம்மையொன்று அன்பளிப்பாக வழங்கப்பட்டமை சர்ச்சையை ஏற்படுத்தியுள்ளது.
சிலியின் உற்பத்தியாளர்கள் மற்றும் சேவை ஏற்றுமதியாளர்கள் சங்கத்தின் வருடாந்த இராப்போசன விருந்து வைபவம் தலைநகர் சன்டியாகோவில் கடந்த செவ்வாய்க்கிழமை நடைபெற்றது.
இந்நிகழ்வில் கலந்துகொண்ட சிலி பொருளாதார அமைச்சர் லூயிஸ் செஸ்பெடஸுக்கு மேற்படி சங்கத்தின் சார்பில் பிரபல வர்த்தகர் ஒருவர் பாலியல் பொம்மையொன்றை அன்பளிப்பாக வழங்கினார்.
காற்றடைக்கப்படக் கூடிய, ஆளுயரமான இந்த பாலியல் பொம்மையை, “பொருளாதாரத்தை முன்னேற்றத்தை தூண்டுவதற்காக” வழங்குவதாக தெரிவிக்கப்பட்டது.
இச்சங்கத்தின் வருடாந்த இராப்போசன விருந்தில் கலந்து கொள்ளும் பிரமுகர்களுக்கு வேடிக்கையான பரிசுகளை வழங்குவது வழக்கமாகவுள்ளது. எனினும், அமைச்சர் ஒருவருக்கு பாலியல் பொம்மை வழங்கப்பட்டமை சமூக வலைத்தளங்களில் விமர்சிக்கப்படுகிறது.
சிலியின் ஜனாதிபதி மிஷெல் பச்செல்டும் இது குறித்து விமர்சித்துள்ளார். இவர் சிலி நாட்டின் முதலாவது பெண் ஜனாதிபதி என்பது குறிப்பிடத்தக்கது.
“பெண்களுக்கு மதிப்பளிப்பது எனது அரசாங்கத்தின் முக்கிய கொள்கை. உற்பத்தியாளர்கள் மற்றும் சேவை ஏற்றுமதியாளர்கள் சங்கத்தின் நடைபெற்ற விடயத்தை சகித்துக் கொள்ள முடியாது” என ஜனாதிபதி மிஷெல் பச்லெட் தெரிவித்துள்ளார்.
