சந்தானம் நடிக்கும் ‘சக்கப் போடு… போடு ராஜா’ படத்தின் மூலம் இசையமைப்பாளராக அறிமுகம் ஆகிறார் சிம்பு.
சேதுராமன் இயக்கத்தில் சந்தானம் நடிக்கும் படத்துக்கு ‘சக்கப் போடு… போடு ராஜா’ என தலைப்பிட்டிருக்கின்றார்கள்.
விடிவி கணேஷ் தயாரிக்கும் இப்படத்தில் ‘சர்வர் சுந்தரம்’ நாயகியான வைபவி ஷாந்தலியா இதிலும் நாயகியாக நடித்து வருகிறார்.
ரோபோ சங்கர், சம்பத், விவேக் உள்ளிட்ட பலர் நடித்து வருகின்றனர், இப்படத்துக்கு இசையமைப்பாளர் யார் என்ற இரகசியத்தை படக்குழு காத்து வந்தது.
இந்நிலையில், சிம்பு ‘சக்கப் போடு… போடு ராஜா’ படத்தின் இசையமைப்பாளராக அறிமுகம் ஆகிறார், இதை சிம்பு தன் ட்விட்டர் பக்கத்தில் உறுதிப்படுத்தியுள்ளார்.
இது குறித்து சிம்பு, ” ‘சக்கப் போடு… போடு ராஜா’ படத்துக்காக முதன்முறையாக இசையமைப்பாளராக பணிபுரிகிறேன், அதற்கான ஒரே காரணம் சந்தானம்தான். ஒரு புதிய பயணம் ஆரம்பமாகிறது. அதற்கு உங்கள் அன்பும் ஆசிர்வாதமும் தேவை” என ட்விட்டரில் குறிப்பிட்டுள்ளார்.
சந்தானம் ட்விட்டரில், ”என்னுடைய காட்ஃபாதர், நல்ல மனிதர் சிம்பு, ‘சக்கப் போடு… போடு ராஜா’ படத்துக்கு இசையமைக்கிறார். ஆசிர்வதிக்கப்பட்டேன்” என்று கூறியுள்ளார்.
