இலங்கையிலிருந்து இயங்கி வரும் இணைய தளங்கள் தொடர்பில் புதிய சட்டங்கள் அறிமுகம் செய்யப்பட உள்ளதாக அரசாங்கம் அறிவித்துள்ளது.
இலத்திரனியல் ஊடகங்கள் மற்றும் அச்சு ஊடகங்களுக்காக ஒழுக்க விதிகள் அறிமுகம் செய்ய உள்ளதாக அரசாங்கம் ஏற்கனவே அறிவித்திருந்தது. தற்போது இலங்கையிலிருந்து இயங்கி வரும் இணைய ஊடகங்களுக்காக புதிய சட்டம் உருவாக்கப்பட உள்ளதாக ஊடக அமைச்சின் செயலாளர் சரித்த ஹேரத் தெரிவித்துள்ளார்.
இலங்கையில் 67 இணைய தளங்கள் மட்டுமே பதிவுக்கு உட்படுத்தப்பட்டுள்ளது. இந்த இணைய தளங்களுக்கு எதிராகவோ அல்லது பதிவு செய்யப்படாத இணைய தளங்களுக்கு எதிராகவே சட்ட நடவடிக்கை எடுக்க முடியாத நிலைமை காணப்படுகின்றது.
எனவே, இந்த குறைபாட்டை நிவர்த்தி செய்யும் வகையில் புதிய சட்டமொன்று உருவாக்கப்பட உள்ளது. சட்டத்தை உருவாக்கும் நோக்கில் பிரதிநிதிகள் குழுவொன்று அமைக்கப்பட்டுள்ளது.
