20 ஓவர் உலகக்கிண்ண தொடரில் அவுஸ்திரேலியாவை மேற்கிந்திய அணி வீழ்த்தியுள்ளது.
வங்கதேசத்தில் நடைபெற்று வரும் 20 ஓவர் உலகக்கிண்ண கிரிக்கெட் போட்டித்தொடரின் லீக் சுற்று ஆட்டத்தில் நேற்று அவுஸ்திரேலியாவும், மேற்கிந்திய தீவுகள் அணியும் மோதின.
முதலில் நாணயசுழற்சியில் வெற்றிபெற்ற அவுஸ்திரேலியா துடுப்பாட்டத்தை தெரிவு செய்தது. அவுஸ்திரேலிய அணி 20 ஓவர் முடிவில் 8 விக்கெட் இழப்பிற்கு 178 ஓட்டங்கள் குவித்தது.
இதையடுத்து 179 ஓட்டங்கள் என்ற கடின இலக்கை நோக்கி மேற்கிந்திய அணிக்கு, கெயிலும், ஸ்மித்தும் முதல் விக்கெட்டுக்கு 50 ஓட்டங்கள் குவித்து நம்பிக்கை அளித்தனர். பின்னர் அதிரடி காட்டிய கெயில், 53 ஓட்டங்களில் ஆட்டமிழந்தார்.
அதன் பின்னரும் இரண்டு விக்கெட்டுகளை மேற்கிந்திய அணி இழந்ததால் ஆட்டம் அவுஸ்திரேலியா பக்கம் திரும்பியது. எனினும் டரன் சமியும் பிராவோவும் கடுமையாக போராடினர்.
ஆட்டத்தின் 19வது ஓவரில் 21 ஓட்டங்கள் எடுத்தனர். இதனால் கடைசி ஓவரில் வெற்றிக்கு 12 ஓட்டங்கள் தேவைப்பட்டபோது பதற்றமின்றி விளையாடிய சமி 3வது மற்றும் 4வது பந்தில் அடுத்தடுத்து சிக்சர் அடித்து அணியை வெற்றி பெற வைத்தார்.
இதனால் 6 விக்கெட் வித்தியாசத்தில் வெற்றி பெற்ற மேற்கிந்திய அணி அடுத்த சுற்று வாய்ப்பில் நீடிக்கிறது. அவுஸ்திரேலியாவின் அடுத்த சுற்று வாய்ப்பு கிட்டத்தட்ட முடிந்துவிட்டது.
