பிரபல திரைப்பட இயக்குனரும், தயாரிப்பாளருமான இராம. நாராயணன் நுரையீரல் கோளாறு காரணமாக சிங்கப்பூரில் மருத்துவ சிகிச்சை பெற்று வந்தார். இந்த நிலையில் சிகிச்சை பலனின்றி நேற்று இரவு அவர் மரணமடைந்தார்.
தயாரிப்பாளர் சங்கத் தலைவராக மூன்று முறை பதவி வகித்த அவர், தமிழ், தெலுங்கு மற்றும் கன்னடம் உள்ளிட்ட 9 மொழிகளில் 128 திரைப்படங்களை இயக்கியுள்ளார். திமுக சார்பாக சட்டமன்ற உறுப்பினராகவும், தமிழக அரசின் இயல், இசை நாடக மன்றத்தின் தலைவராகவும் அவர் பதவி வகித்துள்ளார்.
மிருகங்களை பயன்படுத்தி நிறைய பக்திப் படங்களையும் எடுத்துள்ள அவர் சமீபத்தில் நகைச்சுவை நடிகர் சந்தானம் நடித்த கண்ணா லட்டு தின்ன ஆசையா என்ற படத்தையும் தயாரித்துள்ளார்.
இவரது படைப்பில் ஆடி வெள்ளி, ராஜ காளியம்மன் ஆகிய படங்கள் வசூலில் மிகப்பெரிய சாதனை படைத்துள்ளன. மேலும் இவர் ஒரு மலேய மொழிப் படத்தை இயக்கியுள்ளமை குறிப்பிடத்தக்கது. அவரது உடல் செவ்வாய் அன்று தகனம் செய்யப்பட உள்ளதாக தெரிவிக்கப்பட்டுள்ளது.
