வவுனியா மாவட்டத்தின் தொழில்துறை வளர்ச்சியை அடுத்த கட்டத்திற்கு கொண்டு செல்லும் நோக்கோடும், மாவட்டத்திற்கான பிரத்யேக கைத்தொழில் சம்மேளனத்தை (Chamber of Industries) உருவாக்கும் நோக்கத்தோடும் முக்கிய கலந்துரையாடல் நிகழ்வொன்று வவுனியா மாவட்ட செயலக மாநாட்டு மண்டபத்தில் நடைபெற்றது.
வவுனியா மாவட்ட அரசாங்க அதிபர் P.A.சரத் சந்திர தலைமையில் நடைபெற்ற இந்நிகழ்வை வட மாகாண கைத்தொழில் சம்மேளனம் (Northern Chamber of Industries) மிகச்சிறப்பாக ஒருங்கிணைத்து வழிநடத்தியது.
இதில் தொழில்துறை சார்ந்த அரச உயர்மட்ட அதிகாரிகள், முன்னணி தொழில் முனைவோர், சிறு மற்றும் நடுத்தர கைத்தொழில் (MSME) பிரதிநிதிகள், அபிவிருத்தி சார் பங்குதாரர்கள் மற்றும் முதலீட்டு ஆலோசகர்கள் எனப் பலரும் கலந்துகொண்டு தமது கருத்துக்களைப் பகிர்ந்து கொண்டனர்.
இந்தக் கூட்டத்தில் வவுனியா மாவட்டத்திற்கென ஒரு பலமான கைத்தொழில் சம்மேளனத்தை அமைப்பது குறித்த விரிவான திட்டங்கள் முன்வைக்கப்பட்டன.
குறிப்பாக தொழில் முனைவோர் மற்றும் அரச துறையினரை ஒரே கூரையின் கீழ் கொண்டு வந்து, நிர்வாக ரீதியான தடைகளை களைதல், மாவட்டத்தின் வளங்களைப் பயன்படுத்தி புதிய முதலீடுகளை ஈர்த்தல் மற்றும் புதிய தொழில் வாய்ப்புகளைக் கண்டறிதல், சிறு மற்றும் நடுத்தர தொழில்களின் (SME) நீண்டகால வளர்ச்சியை உறுதிப்படுத்துவதற்கான வழிமுறைகளை ஆராய்தல் போன்ற விடயங்கள் ஆராயப்பட்டன.
வவுனியா மாவட்டத்தின் அமைவிடம் மற்றும் வளங்களைக் கருத்தில் கொண்டு, இயந்திர தொழில்நுட்பம் மற்றும் நவீன கண்டுபிடிப்புகளை ஊக்குவிப்பதன் மூலம் அதிக வேலைவாய்ப்புகளை உருவாக்க முடியும் என இதன்போது சுட்டிக்காட்டப்பட்டது. மேலும், வெளிநாட்டு முதலீடுகளை ஈர்க்கும் வகையிலான ஒரு வலுவான வலையமைப்பை உருவாக்குவதும் இந்த சம்மேளனத்தின் எதிர்கால இலக்காகக் கொள்ளப்பட்டது.
இந்த முன்னெடுப்பானது வவுனியா மாவட்டத்தின் பொருளாதாரத்தில் ஒரு புதிய அத்தியாயத்தைத் தொடக்கி வைப்பதாக அமைந்துள்ளது. அரசாங்கமும் தனியார் துறையும் கைகோர்த்துச் செயல்படும் போது, மாவட்டத்தின் தொழில்துறை வளர்ச்சி சர்வதேச தரத்திற்கு உயரும் என நம்பிக்கை வெளியிடப்பட்டது.
