அவுஸ்திரேலியாவின் சிட்னி தொழில்நுட்ப பல்கலைக்கழக ஆராய்ச்சியாளர்கள், பார்வைக் குறைபாடு மற்றும் பார்வையற்றோருக்கு உதவும் வகையில், செயற்கை நுண்ணறிவு மூலம் இயங்கும் புதிய ரோபோ வழிகாட்டி நாயை உருவாக்கி வருகிறார்.
இந்தத் திட்டத்திற்கு இலங்கையை சேர்ந்த ரோபோட்டிக்ஸ் மற்றும் மெக்கட்ரோனிக்ஸ் நிபுணர் சரத் கொடகொட தலைமை தாங்குகிறார். இந்த ரோபோ ஒரு சாதாரண நாயைப் போலவே வடிவமைக்கப்பட்டுள்ளது.
இது செயற்கை நுண்ணறிவு தொழில்நுட்பம் மற்றும் சென்சார்களைப் பயன்படுத்தி, சுற்றியுள்ள சூழலைக் கண்டறிந்து, பேசிக்கொண்டே மக்களுக்கு வழிகாட்டுகிறது.
இந்த அமைப்பு, நிகழ்நேர செயற்கை நுண்ணறிவு முடிவெடுக்கும் திறன்களுடன் பொருத்தப்பட்டுள்ளது.
மேலும், பாதுகாப்பான பயணத்தை உறுதி செய்வதற்காக, சுற்றியுள்ள சூழலைக் கண்டறிந்து பயனரின் தேவைகளுக்கு ஏற்ப வழித்தடங்களை திட்டமிட, LiDAR போன்ற மேம்பட்ட சென்சார்களைப் பயன்படுத்துகிறது.
உதாரணமாக, ஒரு பயனர் தேனீர் கடைக்குச் செல்ல விரும்புகிறேன் என கூறும்போது, அந்த ரோபோ அருகிலுள்ள இடங்களைக் கண்டறிந்து மாற்று வழிகளைப் பரிந்துரைக்கிறது.
அந்த ரோபோ தேர்ந்தெடுக்கப்பட்ட இடத்திற்கு ஒரு பாதுகாப்பான வழியைத் திட்டமிட்டு பயனருக்கு வழிகாட்டுகிறது.
தேவைப்பட்டால், உள்ளே இருக்கும் சூழலையும் விவரிக்கிறது. இந்த ரோபோ, Unitree Go2 ரோபோ நாய் தளத்தின் அடிப்படையில் வடிவமைக்கப்பட்டுள்ளது. மேலும் இது செயற்கை நுண்ணறிவு, சென்சார்கள் மற்றும் தொட்டுணரக்கூடிய பின்னூட்ட அமைப்பை பயன்படுத்துகிறது.
பார்வைக் குறைபாடு உள்ளவர்களுக்கு அதிக தன்னம்பிக்கையை அளிப்பது, பயணத்தை எளிதாக்குவது மற்றும் சமூகப் பங்கேற்பை அதிகரிப்பது ஆகியவையே இந்தத் திட்டத்தின் நோக்கமாகும்.
எனினும், இது செயற்கை நுண்ணறிவு தொழில்நுட்பத்தால் இயங்கும் ஒரு புதிய தலைமுறை பேசும் ரோபோ வழிகாட்டி நாய் ஆகும். இது எதிர்காலத்தில் பார்வைக் குறைபாடு உள்ள சமூகத்திற்குப் பெரும் உதவியாக இருக்கும் என்று ஆராய்ச்சியாளர்கள் சுட்டிக்காட்டுகின்றனர்.
