அமெரிக்க ஜனாதிபதி ஒபாமா வருகையின் போது பிரதமர் மோடி அணிந்திருந்த கோட் 4.31 கோடிக்கு ஏலம் போனது.
அமெரிக்க ஜனாதிபதி பராக் ஒபாமா இந்தியாவுக்கு சுற்றுப்பயணம் மேற்கொண்டிருந்த போது, “நரேந்திர தாமோதர் தாஸ்” என்று பெயர் பொறிக்கப்பட்ட ஆடையை பிரதமர் நரேந்திர மோடி அணிந்திருந்தார்.
இதன் விலை 10 லட்சம் என்று கூறப்பட்டது. இதை காங்கிரஸ் துணை தலைவர் ராகுல் காந்தி உட்பட பலர் கிண்டல் செய்தனர். ஆனால் மோடி அணிந்த கோட் ஏலம் விடப்படும், அதில் கிடைக்கும் தொகை கங்கை நதி தூய்மைத் திட்டத்துக்கு வழங்கப்படும் என்று அறிவிக்கப்பட்டது.
அதன்படி, சூரத் நகரில் கடந்த 18ம் திகதி காலை தொடங்கிய ஏலம், 20ம் திகதி மாலை வரை நடத்தப்படும் என அறிவிக்கப்பட்டது.
அத்துடன் மோடி பதவியேற்ற பின் கடந்த 7 மாதங்களில் அவருக்கு வந்த 455 பரிசுப் பொருட்களும் ஏலத்துக்கு வந்தன.
முதல்நாளான 18ம் திகதி மாலையில் அதிகபட்சமாக குஜராத்தை சேர்ந்த வெளிநாட்டு வாழ் இந்தியர் விரால் சவுக்கி என்பவர் 1.11 கோடிக்கு ஏலம் கேட்டார்.
தொடர்ந்து விலை அதிகரித்துக் கொண்டே செல்ல, கடைசியில் சூரத்தில் தர்மானந்தா வைர நிறுவனம் நடத்தி வரும் தொழிலதிபர் லால்ஜி படேல் அவருடைய மகன் ஹிதேஷ் படேல் இருவரும் சேர்ந்து 4.31 கோடிக்கு ஏலம் எடுத்தனர்.
