சிம்பாவே அணியை வீழ்த்தி திரில் வெற்றியை பதிவுசெய்த அயர்லாந்து அணி!!

சிம்பாவே அணிக்கு எதிரான உலகக்கிண்ண லீக் ஆட்டத்தில் அயர்லாந்து 5 ஓட்டங்கள் வித்தியாசத்தில் திரில் வெற்றி பெற்றது.

அவுஸ்திரேலியாவின் ஹோபட் நகரில் இன்று நடைபெற்ற மற்றொரு பி பிரிவு லீக் போட்டியில், அயர்லாந்து, சிம்பாவே அணிகள் பலப்பரீட்சை நடாத்தின.

இதில் நாணய சுழற்சியில் வெற்றிபெற்ற சிம்பாவே களத்தடுப்பை தெரிவு செய்தது. அயர்லாந்து அணிக்கு ஸ்டெர்லிங் (10) தொடக்கத்திலே ஆட்டமிழந்து அதிர்ச்சி கொடுத்தார்.

மற்றொரு தொடக்க வீரரான போர்டர்பீல்ட் (29) சிம்பாவே பந்துவீச்சை போராடி சமாளித்த நிலையில் வெளியேறினார். எட் ஜோய்ஸ் அசத்தலாக விளையாடி வந்தார். இவரும் பால்பிரினேவும் அணியின் ஓட்டங்களை உயர்த்தினர்.

இருவரும் சிறப்பாக விளையாடி வந்த நிலையில், அணியின் ஓட்டங்கள் 217 என்று இருக்கும் போது எட் ஜோய்ஸ் (112) சதம் அடித்து ஆட்டமிழந்தார். மறுமுனையில் பால்பிரினே அரைசதம் கடந்தார்.

இவருடன் ஜோடி சேர்ந்த கெவின் ஓ பிரைன் (24), வில்சன் (25), மோனி (10), நிர்யால் ஓ பிரைன் (2) அடுத்தடுத்து ஆட்டமிழந்தனர்.
அதிரடி காட்ட ஆரம்பித்த பால்பிரினே 97 ஓட்டங்கள் குவித்த போது ஓட்ட முறையில் ஆட்டமிழந்து சதத்தை தவறவிட்டார்.

இதனால் அயர்லாந்து அணி 50 ஓவர் முடிவில் 8 விக்கெட் இழப்பிற்கு 331 ஓட்டங்களை குவித்தது.

சிம்பாவே சார்பில் பந்து வீச்சில், சாடாரா, வில்லியம்ஸ் தலா 3, பன்யான்காரா 1 விக்கெட்டுகளை வீழ்த்தினர்.

கடின இலக்கை நோக்கி களமிறங்கிய சிம்பாவே அணி ஆரம்பத்திலே திணற ஆரம்பித்தது. தொடக்க வீரர்களான சிபாவா (12), சிக்கந்தர் (12) அடுத்தடுத்து ஆட்டமிழந்தனர். இவரைத் தொடர்ந்து மிர்ரேயும் (11) ஆட்டமிழந்தார்.

மசகட்சா 5 ஓட்டங்களில் வெளியேற, அடுத்து ஜோடி சேர்ந்த டெய்லர், வில்லியம்ஸ் சிறப்பாக விளையாடினர்.
அதிரடியாக விளையாடிய டெய்லர் 121 ஓட்டங்கள் குவித்த போது ஆட்டமிழந்தார். இவரது சதம் அணியின் ஓட்டங்களை அதிகப்படுத்தியது.

பின்னர் வந்த எர்வின் (11) வந்த வேகத்தில் ஆட்டமிழக்க, மறுமுனையில் அசத்திக் கொண்டிருந்த வில்லியம்ஸூம் (96) ஆட்டமிழந்தார்.

அணியின் ஓட்டங்கள் 300ஐ தொட்டது. ஆனால் 7 விக்கெட்டுகளை இழந்து இக்கட்டான நிலையில் இருந்தது சிம்பாவே.
அடுத்து வந்த பையான்காரா (5), சாகப்வா (17), முப்பரிவா (18) வரிசையாக ஆட்டமிழக்க, சிம்பாவே 49.3 ஓவரில் அனைத்து விக்கெட்டுகளையும் இழந்தது. இதனால் அயர்லாந்து 5 ஓட்டங்கள் வித்தியாசத்தில் திரில் வெற்றி பெற்றது.

பந்துவீச்சில் அசத்திய குசாக் 4, மோனி, கெவின் ஓ பிரைன் தலா 2, டோக்ரெல், மெக்பிரைன் தலா 1 விக்கெட்டுகளையும் வீழ்த்தினர்.