தமிழக சட்டசபை தேர்தலில் தனித்துப் போட்டியிட்ட அ.தி.மு.க. 40.8 சதவீதம் வாக்குகளைப் பெற்றது. இது தமிழக அரசியல் வரலாற்றில் அ.தி.மு.க. இதுவரை இத்தகைய அபரிதமான செல்வாக்கைப் பெற்றதில்லை என்று சொல்லும் அளவுக்கு மக்கள் ஆதரவைப் பெற்றுள்ளது.
அதே சமயத்தில் தி.மு.க. கூட்டணி 39.8 சதவீதம் வாக்குகளை பெற்று தனது வலிமையை காட்டியுள்ளது. தி.மு.க. கூட்டணியில் தி.மு.க.– 31.6 சதவீதம், காங்கிரஸ்– 6.5 சதவீதம், இந்தியன் யூனியன் முஸ்லிம் லீக்–0.7 சதவீதம், மனிதநேய மக்கள் கட்சி – 0.5 சதவீதம், புதிய தமிழகம் – 0.5 சதவீதம் வாக்குகளைப் பெற்றுள்ளது.
இதன் அடிப்படையில் பார்த்தால் அ.தி.மு.க.வுக்கும், தி.மு.க. கூட்டணிக்கும் இடையே ஒரே ஒரு சதவீதம் வாக்குதான் வித்தியாசம் உள்ளது. இந்த ஒரு சதவீத ஓட்டு வித்தியாசம் அ.தி.மு.க. ஆட்சி கட்டிலில் அமர்த்தி விட்டு, தி.மு.க.வை எதிர்க்கட்சி வரிசைக்கு தள்ளியுள்ளது.
ஒவ்வொரு கட்சியும் போட்டியிட்ட இடங்களில் பெற்ற வாக்கு சதவீதத்தை ஆய்வு செய்தால் அ.தி.மு.க.வை விட தி.மு.க.வே அதிக ஓட்டு சதவீதத்தை பெற்றிருப்பது தெரிய வந்துள்ளது. 232 தொகுதிகளிலும் போட்டியிட்ட அ.தி.மு.க. 40.78 சதவீதம் வாக்குகளை பெற்றுள்ளது.
ஆனால் 176 தொகுதிகளில் மட்டுமே போட்டியிட்ட தி.மு.க. 41.05 வாக்குகளைப் பெற்றுள்ளது. இதன் மூலம் போட்டியிட்ட இடங்களில் அ.தி.மு.க.வை விட தி.மு.க. வுக்கு அதிக ஆதரவு இருப்பது உறுதிப்படுத்தப்பட்டுள்ளது.
வடமாவட்டங்களில் பா.ம.க. பிரித்த வாக்குகள், மற்ற மாவட்டங்களில் தே.மு.தி.க.– மக்கள் நலக் கூட்டணி கட்சிகள் பிரித்த வாக்குகள்தான் அ.தி.மு.க. – தி.மு.க. இடையிலான 1 சதவீத வாக்கு வித்தியாசத்துக்கு முக்கிய காரணமாகக் கூறப்படுகிறது.
இது சுமார் 100 தொகுதிகளில் தி.மு.க. கூட்டணியின் வெற்றி வாய்ப்பை திசை திருப்பி விட்டு விட்டது. 2006ம் ஆண்டு நடந்த தேர்தலில் தே.மு.தி.க. பிரித்த வாக்குகள் அ.தி.மு.க. சுமார் 100 தொகுதிகளில் தோல்வி அடைய காரணமாக இருந்தது.
அது போல 2011ம் ஆண்டு தேர்தலில் அ.தி.மு.க. – தே.மு.தி.க. கூட்டணி வாக்குகள் தி.மு.க.வை வீழ்த்தியது. ஆனால் இந்த தடவை பல முனைப் போட்டிகளால் ஏற்பட்ட ஓட்டு சிதறல்கள் தி.மு.க.வுக்கு ஒரே ஒரு சதவீதம் எனும் நுலிழையில் வெற்றி வாய்ப்பை கை நழுவி போக செய்து விட்டது.
