நேற்று லண்டன் நகரில் ஏலத்திற்கு வந்த உலகின் மிகப் பெரிய கச்சா வைரம் எவராலும் கொள்வனவு செய்யப்படவில்லை.
இந்த “லெசிடி லா ரோனா” என்ற வைரம் 70 மில்லியன் டொலருக்கும் அதிகமாக விலை போகும் என்று எதிர்பார்க்கப்பட்டது.
எனினும் அதற்கு 61 மில்லியன் டொலர் கேள்வியே இருந்துள்ளதால் அது நேற்று விற்பனை செய்யப்படவில்லை.
இது விற்பனை செய்யப்பட்டால் போட்ஸ்வானா அரசுக்கு 60% இலாபம் கிட்டும். ஒரு டென்னிஸ் பந்தின் அளவு உள்ள அந்த வைரம், 1,109 காரட் ஆகும்.
கடந்த ஆண்டு நவம்பர் மாதம் கண்டுபிடிக்கப்பட்ட இந்த வைரம் 2.5 பில்லியன் ஆண்டுகள் பழமையானது என்று தெரிவிக்கப்பட்டுள்ளது.
இவ்வளவு பெரிய கச்சா வைரம் இதுவரை பொது ஏலத்திற்கு வைக்கப்பட்டது இல்லை. பொதுவாக இந்த மாதிரியான வைரங்கள், இரகசிய ஏலத்தில், சீல் வைக்கப்பட்ட கவர்களில், அதிகப்படியாக விலைதர முன்வரும் தனி நபர் விநியோகஸ்தர்களுக்கு வழங்கப்படும்.
1905 ஆம் ஆண்டு தென் ஆப்ரிக்க சுரங்கத்தில் கண்டுபிடிக்கப்பட்ட 3,106 கரட் க்யுல்லினான் வைரமே இதுவரை கண்டுபிடிக்கப்பட்ட வைரங்களில் மிகப் பெரியது.
அது 9 கற்களாக வெட்டப்பட்டது, அந்த வெட்டப்பட்ட கற்களில் பெரியதான ´கிரேட் ஸ்டார் ஆஃப் ஆப்ரிக்கா´ என்று அழைக்கப்படும் கல், லண்டன் டவரில் வைக்கப்பட்டுள்ள பிரிட்டிஷ் அரசியின் செங்கோலில் பதிக்கப்பட்டுள்ளது.
