காதலில் விழுந்த தினேஷ் கார்த்திக்!!

திரையுலகைச் சேர்ந்த நட்சத்திரங்கள் காதலில் விழுவது போல விளையாட்டு உலகிலும் ஒரு புதிய காதல் பூத்துள்ளது.
ஸ்குவாஷ் போட்டியில் கலக்கிக் கொண்டிருப்பவர் சென்னையில் பிறந்தவரான மலையாளத்து தீபிகா பல்லிக்கல்.

இளம் வயதிலிருந்தே புகழுச்சியில் இருக்கும் தீபிகா ஸ்குவாஷ் வீராங்கனைகள் வரிசையில் சர்வதேச அளவில் உச்சத்தில் உள்ளார்.
தீபிகாவின் அழகில் மயங்கிய திரையுலகினர் அவரை நடிக்க வைக்க கடுமையாக போராடிப் பார்த்தார்கள்.

ஏன் நடிகர் சிம்புவே கூட தீபிகாவை அணுகியதாக கூறப்பட்டது. ஆனால் அழகாக சிரித்தபடி அத்தனை அழைப்புகளையும் நிராகரித்து விட்டார் தீபிகா. கிசுகிசுக்கள் எதிலும் சிக்காமல் இருந்த தீபிகா தற்போது தினேஷின் காதல் பந்தில் போல்டாகி விட்டார்.

தமிழகத்தைச் சேர்ந்த கிரிக்கெட் விரர் தினேஷ் கார்த்திக் 21 வயதிலேயே நிகிதா என்பவரை மணந்தார். சின்ன வயது முதலே பழகியவர் நிகிதா. ஆனால் இந்தத் திருமணம் சீக்கிரமே உடைந்து போனது. நிகிதாவுக்கும், இந்திய கிரிக்கெட் அணியில் இருந்த ஒரு வீரருக்கும் இடையே ரகசியத் தொடர்பு இருந்துள்ளதாம். இந்த வீரர் தினேஷின் நெருங்கிய நண்பரும் கூட.

இதனால் அதிர்ச்சியாகிப் போன தினேஷ் மனைவியை விட்டுப் பிரிந்தார். பின்னர் விவாகரத்து செய்து விட்டார். நிகிதாவைப் பிரிந்த பின்னர்தான் அவர் கிரிக்கெட்டில் முழு வீச்சில் ஆர்வம் காட்டினார். பல போட்டிகளில் பட்டையைக் கிளப்பினார். இந்திய அணியில் தற்போது அவருக்கு ஒரு நல்ல இடம் கிடைத்துள்ளது.

இந்நிலையில் சென்னையில் உள்ள ஒரு உடற்பயிற்சிக் கூடத்தில் வைத்து தீபிகாவை சந்தித்துள்ளார் தினேஷ். முதல் பார்வையிலேயே அவர்களுக்குள் ஏதோ புரிந்து போய் விட்டதாம். அதன்பின்னர் அடிக்கடி சந்திக்க நட்பு பூத்து, காதலாகி கணிந்தது.

கடந்த மார்ச் மாதம் பயிற்சிக்காக இங்கிலாந்து போயிருந்தார் தீபிகாவை சந்தித்து இனிய அதிர்ச்சி கொடுத்தார் தினேஷ். பின்னர் சம்பியன்ஸ் கிண்ண போட்டியில் ஆடியபோது தினேஷுடன் நிறைய நேரத்தை செலவிட்டுள்ளார் தீபிகா.

தீபிகாவுடன் ஏற்பட்டுள்ள இந்தக் காதலால்தான் தினேஷ் முன்பை விட சிறப்பாக ஆடுவதாக கூறுகின்றனர். தீபிகாவின் காதல் உண்மைதான் என்று அவரது வீட்டார் கூறுகின்றனர். இந்தக் காதலுக்கு இரு வீட்டாரும் பச்சைக் கொடி விட்டனராம்.

இருவருக்கும் இடையே நிச்சயதார்த்தம் கூட முடிந்து விட்டதாகவும் சொல்கிறார்கள். திருமணம் எப்போது என்பது இன்னும் முடிவாகவில்லை.