தமிழக முதல்வர் ஜெயலலிதா கடந்த 22ம் திகதி முதல் உடல்நிலை சரியில்லாத காரணத்தினால் சென்னை கிரீம்ஸ் சாலையில் உள்ள அப்பல்லோ மருத்துவமனையில் சிகிச்சை பெற்று வருகிறார்.
அவருக்கு லண்டன் மருத்துவர் ரிச்சர்டு தலைமையிலான மருத்துவர் குழுவும், டெல்லி எய்ம்ஸ் மருத்துவர்கள் கொண்ட குழுவும் தொடர்ந்து சிகிச்சை அளித்து வருகின்றனர்.
அவர்களின் ஆலோசனைகளின் பேரிலே அப்பல்லோ மருத்துவர்களும் சிகிச்சை அளித்து வருகின்றனர்.
மேலும் அவருக்கு பிசியோதெரபி சிகிச்சை அளிப்பதற்காக சிங்கப்பூர் மருத்துவர்கள் இன்று வரவிருப்பதாக செய்திகள் உலா வந்தன.
இந்நிலையில் தமிழக முதல்வர் அவர்களின் உடல் நிலை குறித்து அறிவதற்காக, தமிழகத்தின் சூப்பர் ஸ்டார் ரஜினிகாந்த் மற்றும் அவரது மகள் ஐஸ்வர்யா இன்று மாலை 6.35 மணி அளவில் சென்னை அப்பல்லோ மருத்துவமனைக்கு வந்தனர். அவர்கள் வருவது யாருக்கும் தெரியாது எனவும் ரகசியமாக வைக்கப்பட்டது எனவும், அவர்கள் வருவதற்கு 5 நிமிடத்திற்கு முன்னர் தான் கட்சியின் முக்கிய நிர்வாகிகள் சிலருக்கு தெரியவந்ததாக தகவல்கள் தெரிவிக்கின்றன.
மருத்துவமனை வந்த அவர்கள் அப்பல்லோ மருத்துவர்கள் மற்றும் அமைச்சர்கள் ஆகியோரிடம் முதல்வர் ஜெயலலிதாவின் உடல் நிலைகுறித்து கேட்டறிந்ததாக கூறப்படுகிறது. அதன் பின் பத்திரிக்கையாளர்களை சந்திக்காமல் நேரடியாக காரில் ஏறிச் சென்று விட்டதாகவும் கூறப்படுகிறது.
