பரபரப்பான இரண்டாவது டெஸ்டில் துடுப்பாட்டத்தில் சொதப்பிய பாகிஸ்தான் அணி சிம்பாவேயிடம் 24 ஓட்டங்கள் வித்தியாசத்தில் பரிதாபமாக தோல்வி அடைந்தது.
பாகிஸ்தான், சிம்பாவே அணிகள் மோதும் இரண்டாவது டெஸ்ட் ஹராரேயில் நடைபெற்றது. முதல் இன்னிங்சில் சிம்பாவே 294, பாகிஸ்தான் 230 ஓட்டங்களை பெற்றுக்கொண்டன.
சிம்பாவே அணி இரண்டாவது இன்னிங்சில் 199 ஓட்டங்களுக்கு சகல விக்கட்டுகளையும் இழந்தது. 264 ஓட்டங்கள் என்ற வெற்றி இலக்குடன் களமிறங்கிய பாகிஸ்தான் அணி ஆரம்பம் முதல் திணறியது.
பாகிஸ்தான் அணி நான்காம் நாள் ஆட்டநேர முடிவில் 5 விக்கெட் இழப்பிற்கு 158 ரன்கள் எடுத்திருந்தது. நேற்று கடைசி நாள் ஆட்டம் நடைபெற்றது. சிம்பாவே பந்துவீச்சாளர்கள் தொடர்ந்து சிறப்பாக செயல்பட பாகிஸ்தான் விக்கெட்டுகள் சரிந்தன.
கடைசி கட்டத்தில் ரகத் அலி(1) ரன் அவுட்டாக, பாகிஸ்தான் அணி இரண்டாவது இன்னிங்சில் 239 ரன்களுக்கு சகல விக்கட்டுகளையும் இழந்து தோல்வி அடைந்தது. கடைசி வரை போராடிய மிஸ்பா 79 ஓட்டங்களுடன் ஆட்டமிழக்காமல் இருந்தார். சிம்பாவே சார்பில் சடாரா 5 விக்கெட்களை வீழ்த்தி அசத்தினார்.
இப்போட்டியில் திரில் வெற்றி பெற்று வரலாறு படைத்த சிம்பாவே அணி தொடரை 1-1 என சமன் செய்தது. தவிர பாகிஸ்தானுக்கு எதிராக 1998ம் ஆண்டிற்கு பிறகு வெற்றி பெற்றது. இதன் மூலம் டெஸ்ட் தரவரிசையில் பாகிஸ்தான் அணி நான்காவது இடத்தில் இருந்து 6வது இடத்துக்கு தள்ளப்பட்டது. சிம்பாவே அணி வங்கதேசத்தை பின் தள்ளி 9வது இடத்துக்கு முன்னேறியது.