செட்டிகுளம், துட்டுவாகை பகுதியில் நேற்று முன்தினம் (11.01.2017) அன்று வீரமாணிக்கன்குளம் திருமகள் வித்தியாலயம் எனும் புதிய பாடசாலை திறந்து வைக்கப்பட்டுள்ளது.
பாடசாலை அதிபர் க.கோமளேஸ்வரன் தலைமையில் இடம்பெற்ற குறித்த நிகழ்வில் பிரதம விருந்தினர்களாக வன்னி மாவட்ட நாடாளுமன்ற உறுப்பினர்களாகிய செல்வம் அடைக்கலநாதன், சிவசக்தி ஆனந்தன், வடமாகாண சுகாதார அமைச்சரின் இணைப்புச் செயலாளர் பாலச்சந்திரன் சிந்துஜன் ஆகியோர் கலந்து கொண்டதுடன் சிறப்பு விருந்தினர்களாக வவுனியா தெற்கு வலயக்கல்வி பணிப்பாளர், செட்டிகுளம் கோட்டக்கல்விப்பணிப்பாளர் உள்ளிட்ட பலர் கலந்து கொண்டனர்.
இதன்போது உரையாற்றிய பிரதம விருந்தினர்களுள் ஒருவராகிய சுகாதார அமைச்சரின் இணைப்புச் செயலாளர் பாலச்சந்திரன் சிந்துஜன், ஒர் சமூகத்தின் எழுச்சிக்கு பாடசாலையே பிரதான வகிபாகமாக உள்ளது. அதிலும் குறிப்பாக ஆரம்ப நிலை கல்வி மேலும் முக்கியத்துவம் பெறுகின்றது. அவ்வகையில் இன்றைய தினம் இந்த பாடசாலை இங்கு உதயமாகியதன் மூலம் இந்த பின்தங்கிய பிரதேசம் இன்று முதல் வளர்ச்சிப்பாதையை நோக்கி செல்லும் எனவும் தெரிவித்தார்.
அத்துடன் சுகாதார அமைச்சர் Dr.ப.சத்தியலிங்கம் அவர்கள் இந்த பாடசாலையின் வேலி அமைப்பிற்காக ஏற்கனவே இந்த வருடத்திற்கான தனது நிதியினை ஒதுக்கீடு செய்துள்ளார் என தெரிவித்ததுடன் இப்பாடசாலைக்கு தேவையான மேலதிக வளங்களை கல்வி அமைச்சருடன் பேசி பெற்றுக்கொடுப்பதாகவும் உறுதியளித்துள்ளார் என்ற சுகாதார அமைச்சர் Dr.ப.சத்தியலிங்கம் அவர்களின் செய்தியினையும் தெரிவித்தார்.
குறித்த நிகழ்வில் பெற்றோர், மாணவர்கள், கிராம மக்கள் உள்ளிட்ட பலர் கலந்து கொண்டிருந்தமை குறிப்பிடத்தக்கது.
