டெஸ்ட் மற்றும் T20 உள்ளிட்ட எந்த வகையான கிரிக்கெட் போட்டியானாலும் அதில் விக்கெட் எடுப்பதே முக்கியம் என்று சுழற்பந்து வீச்சாளர் ஹர்பஜன் சிங் தெரிவித்துள்ளார்.
சம்பியன்ஸ் லீக் T20 போட்டியில் பங்கேற்கும் மும்பை இண்டியன்ஸ் அணிக்காக ஹர்பஜன் விளையாட உள்ளார். அதற்காக ஆமதாபாதில் பயிற்சியில் ஈடுபட்டு வருகிறார். அப்போது அவர் தொலைபேசி மூலம் பிடிஐ செய்தி நிறுவனத்துக்கு அளித்த பேட்டியில் கூறியது:
ஒரு நாள் ஆட்டம் T20 மற்றும் டெஸ்ட் உள்ளிட்ட போட்டிகளில் விளையாட வேண்டும் என்பதே என் விருப்பம். வெற்றி பெறுவதில் மாற்றம் இருக்கப் போவது இல்லை. எல்லா விதமான போட்டிகளிலும் விக்கெட் எடுப்பது மட்டுமே முக்கியம். சர்வதேச ஆட்டங்களில் விளையாடும் வேட்கை என்னிடம் இன்னும் உள்ளது. ஆனால், நான் அடுத்து எந்த ஆட்டத்தொடரில் விளையாடுகிறேனோ அதில் மட்டுமே என் முழுகவனம் இருக்கும்.
எந்த வெற்றியாக இருந்தாலும் நமக்கு உத்வேகத்தை அளிக்கும். அதுபோல் எனக்கு 2011 ஆம் ஆண்டு சம்பியன்ஸ் லீக் ஆட்டத் தொடரில் என் தலைமையில் மும்பை இண்டியன்ஸ் பெற்ற வெற்றிகள் என்னால் மறக்க முடியாதவை.
இதுவரை எனது ஆட்டத்தை தொலைக்காட்சியில் பார்த்தது கிடையாது. கிரிக்கெட்டில் இருந்து ஓய்வு பெற்றப் பின்பே என் சாதனைகளை தொலைக்காட்சியில் முன் அமர்ந்து ரசிப்பேன் என்றார்.
