திரில் போட்டியில் நியுஸிலாந்து வெற்றி : மயிரிலையில் ஆஸி தோல்வி!!

நியுஸிலாந்து மற்றும் அவுஸ்திரேலிய அணிகள் மோதிய முதலாவது ஒருநாள் போட்டியில் நியுஸிலாந்து அணி திரில் வெற்றிபெற்றது.

இறுதிவரை விறுவிறுப்பாக இடம்பெற்ற இந்த போட்டியில் ஹசல்வூட்டின் கவனக்குறைவினால் அவுஸ்திரேலிய அணி மயிரிலையில் வெற்றியை நழுவ விட்டது.

இந்த போட்டியில் முதலில் துடுப்பெடுத்தாடிய நியுஸிலாந்து அணி 50 ஓவர்கள் நிறைவில் 9 விக்கட்டுகளை இழந்து 286 ஓட்டங்களை பெற்றுக்கொண்டது. நியுஸிலாந்து அணி சார்பில் புரூம் 73 ஓட்டங்களை பெற்றுக்கொண்டார்.

பதிலுக்கு துடுப்பெடுத்தாடிய அவுஸ்திரேலிய அணி ஆரம்பத்தில் கடும் தடுமாற்றத்தை எதிர்நோக்கியது. ஒரு கட்டத்தில் அவுஸ்திரேலிய அணி 67 ஓட்டங்களுக்கு 6 விக்கட்டுகளை இழந்து தடுமாறியது.

எனினும் அடுத்து ஜோடி சேர்ந்த போல்க்னர், ஸ்டொனிஸ் 81 ஓட்டங்களை இணைப்பாட்டமாக பெற்று அணியின் ஓட்ட எண்ணிக்கையை வலுப்படுத்தினர்.

போல்க்னர் ஆட்டமிழக்க நிலைத்து நின்று ஆடிய ஸ்டொனிஸ் இறுதிவரை ஆட்டமிழக்காமல் 146 ஓட்டங்களை பெற்றுக்கொண்டார்.

இறுதி விக்கட்டில் 19 பந்துகளுக்கு 7 ஓட்டங்களை மாத்திரம் பெறவேண்டிய நிலையில் இருந்த அவுஸ்திரேலிய அணி ஹஷல்வூட்டின் கவனயீனம் காரணமாக 280 ஓட்டங்களுக்கு சகல விக்கட்டுகளையும் இழந்து 5 ஓட்டங்களால் தோல்வியடைந்தது.

போட்டியின் சிறப்பாட்டக்காரராக அவுஸ்திரேலிய அணியின் ஸ்டொனிஸ் தெரிவுசெய்யப்பட்டார்.