இயக்குனரும், நடிகருமான பார்த்திபன் கடைசியாக வித்தகன் என்ற படத்தை இயக்கி நடித்திருந்தார். அதன் பிறகு தமிழ் சினிமாவில் இவர் இயக்கிய முதல் படமான புதிய பாதையை ரீமேக் செய்ய திட்டமிட்டிருந்தார். இப்படத்தில் நடிக்க இப்போதைய பல முன்னணி நடிகர்களிடம் கேட்டபோது யாரும் நடிக்க முன்வரவில்லை. இதனால் இந்த முயற்சியை கிடப்பில் போட்டுவிட்டு மற்ற இயக்குனர்களின் படங்களில் நடிக்கத் தொடங்கினார்.
இந்நிலையில் தற்போது கரு.பழனியப்பன் இயக்கும் ஜன்னல் ஓரம் படத்தில் நடித்து வருகிறார். இந்த படத்தில் இவருடன் விமல், விதார்த் ஆகியோரும் நடித்து வருகின்றனர். இந்த படத்துக்காக தனது உடல் எடையை அதிகப்படுத்தியுள்ளாராம் பார்த்திபன்.
இதுகுறித்து அவரிடம் கேட்டபோது ஜன்னல் ஓரம் படத்தில் ஒரு டிரைவர் வேடத்தில் நடிக்கிறேன். அந்த டிரைவர் 24 மணி நேரமும் குடித்துக் கொண்டே இருப்பார். அதனால் அவரது உடம்பு பெருத்து விடுகிறது. அந்த பாதிப்பை தத்ரூபமாக வெளிப்படுத்த வேண்டும் என்பதற்காக உடல் எடையை அதிகப்படுத்தி நடித்து வருகிறேன் என்று அவர் கூறினார்.