யுவராஜ் அதிரடி ஆட்டத்தால் இந்தியா ரெட் அணியை 11 ஓட்டங்கள் வித்தியாசத்தில் வீழ்த்தி இந்தியா ப்ளூ அணி சலஞ்சர்ஸ் கிண்ண போட்டியின் இறுதிச்சுற்றுக்கு முன்னேறியது.
என்கேபி சலஞ்சர் கிண்ண தொடர் இந்தூரில் நடைபெற்று வருகிறது. இதில் யூசுஃப் பதான் தலைமையிலான இந்தியா ரெட் அணியும் யுவராஜ் தலைமையிலான இந்தியா ப்ளூ அணியும் வெள்ளிக்கிழமை மோதின.
நாணய சுழற்சியில் வெற்றிபெற்ற ரெட் அணி களத்தடுப்பை தேர்வு செய்தது. அந்த அணியின் பாண்டே 70 ஓட்டங்களும், அபிஷேக் 75 ஓட்டங்களும் எடுத்தனர். தொடக்க ஆட்டக்காரர் அக்ஷத் மற்றும் யுவராஜ் தலா 84 ஓட்டங்களை எடுத்து அணியின் ஸ்கோரை உயர்த்தினர்.
குறிப்பாக யுவராஜின் ஆட்டத்தில் அனல் பறந்தது. அவர் 53 பந்துகளில் 84 ஓட்டங்களை எடுத்தார். இதில் 5 சிக்ஸர்களும் 6 பவுண்டரிகளும் அடங்கும். 50 ஓவர் முடிவில் 4 விக்கெட்டுகள் இழப்புக்கு 345 ஓட்டங்கள் குவித்தது.
அடுத்து களமிறங்கிய இந்தியா ரெட் அணியின் தொடக்க ஆட்டக்காரர் அபினவ் முகுந்த் 83 ஓட்டங்களும் சமித் படேல் 68 ஓட்டங்களும் எடுத்தனர். மற்ற வீரர்கள் அடுத்தடுத்து ஆட்டமிழந்ததால் வெற்றிக்கான இலக்கை அந்த அணியால் எடுக்க முடியவில்லை. இதனால், அந்த அணி 49.5 ஓவர்களில் 334 ஓட்டங்களுக்கு சகல விக்கெட்டுகளையும் இழந்தது.
இந்த வெற்றி மூலம் இந்தியா ப்ளூ அணி இறுதிப் போட்டிக்கு தகுதி பெற்றது. இந்தியா ரெட் மற்றும் டில்லி அணிகள் இடையே நடைபெற உள்ள போட்டியில் வெற்றி பெறும் அணி இறுதிப்போட்டிக்கு முன்னேறும்.
