தமிழ் சினிமாவில் மனோரமா, சச்சு போன்ற காமெடி நடிகைகளைத் தொடர்ந்து கோவை சரளா வந்தார். ஆனால் அவருக்குப்பிறகு காமெடிக்கு சரியான நடிகை இல்லை. அதனால், பிரதான காமெடியன்களே தங்களுடன் ஜோடியாக நடிக்க நல்ல காமெடி நடிகை கிடைக்காமல் அல்லாடுகிறார்கள். வடிவேலு பிசியாக இருந்த நேரத்தில் குண்டு ஆர்த்தியை சில படங்களில் நடிக்க வைத்தார். ஆனால் இப்போது அவரையும் காணவில்லை.
இந்தநிலையில் தற்போது காமெடியில் முன்னணி வகித்து வரும் சந்தானம், சில நடிகைகளை தன்னுடன் நடிக்க வைத்து வந்தார். அதில் தனக்கு ஈடு கொடுத்து நடிக்கக்கூடிய நடிகையாக இருந்தால் அவர்களுக்கு தொடர்ந்து சான்ஸ் கொடுக்கலாம் என்று நினைத்தார். அப்படி பார்த்ததில் காதல் சந்தியாவின் காமெடி சந்தானத்துக்கு ரொம்ப பிடித்து விட்டதாம்.
ஏற்கனவே மலையாளத்தில் நிறைய காமெடி படங்களில் நடித்து தேர்ச்சி பெற்றிருந்த சந்தியா, யா யா படத்தில் அற்புதமாக காமெடி செய்தாராம். அதனால், அவரை தொடர்ந்து தன்னுடன் கூட்டணி அமைக்குமாறு இழுத்து வருகிறார் சந்தானம்.
ஆனால் சந்தியாவோ மலையாளத்தில் இப்போதும் வெயிட்டான கதாபாத்திரங்களில் நான் நடித்து வருகிறேன். இந்த நேரத்தில் முழுநேர காமெடி நடிகையாக மாறினால் எனது குணச்சித்திர நடிகை என்ற இமேஜ் போய்விடும் என்று சந்தானத்துக்கு வளைந்து கொடுக்காமல் தொடர்ந்து இழுத்தடித்து வருகிறாராம். இருப்பினும் நடிகையை விடாமல் துரத்துகிறாராம் சந்தானம்.
