நடிகை ஹன்சிகா தெலுங்கில் நடித்து 2010ல் வெளியான சீதாராமுல கல்யாணம் லங்கலோ என்ற படம் தமிழில் ரவுடி கோட்டை என்ற பெயரில் டப்பிங் செய்யப்பட்டு உள்ளது. இப்படத்தை இம்மாதம் இறுதியில் தமிழகமெங்கும் ரிலீஸ் செய்ய ஏற்பாடு நடக்கிறது.
இதற்கு ஹன்சிகா எதிர்ப்பு தெரிவித்து உள்ளார். தெலுங்கு படத்தில் என்னை ஒப்பந்தம் செய்த போது தமிழில் டப்பிங் செய்ய மாட்டோம் என உறுதி அளித்தனர். எனவே தமிழில் வெளியிடுவதை தடுக்கும்படி நடிகர்கள் சங்கத்தில் புகார் செய்வேன் என்று கூறினார்.
இதற்கு பதில் அளித்து தயாரிப்பாளர் எஸ்.சுந்தரலட்சுமி இன்று வெளியிட்டுள்ள அறிக்கையில் கூறு இருப்பதாவது..
தெலுங்கில் வெளியான சீதாராமுல கல்யாணம் லங்கலோ என்ற படத்தை தமிழில் மொழி மாற்றம் செய்ய அதன் தயாரிப்பாளர் வெல்கார் எண்டர்பிரைசஸ் விஜய் மல்லா பிரசாத்திடம் இருந்து வாங்கினேன். படத்தின் மொழி மாற்றம் மற்றும் அனைத்து வேலைகளையும் முடித்து ரவுடி கோட்டை என்ற பெயரில் திரையிட முடிவான நேரத்தில் ஹன்சிகா எதிர்ப்பது அதிர்ச்சி அளிக்கிறது.
ஹன்சிகாவுக்கும் தெலுங்கு பட அதிபருக்கும் இடையே எந்த மாதிரியான ஒப்பந்தம் ஏற்படுத்தப்பட்டு இருக்கிறது என்பது எங்களுக்கு தெரியாது. நாங்கள் தெலுங்கு பட அதிபரிடம் கேட்ட போது ஹன்சிகா சொல்வது மாதிரி தெலுங்கை தவிர எந்த மொழியிலும் படத்தை மொழி மாற்றம் செய்யக்கூடாது என்று எங்களுக்குள் எந்த ஒப்பந்தமும் கிடையாது. வாய்மொழியாக கூட ஹன்சிகா கேட்கவும் இல்லை. நாங்களும் வாய்மொழியாக ஒப்புக்கொள்ளவும் இல்லை என்றார்.
ஹன்சிகா படத்துக்கு தடை கேட்டு வழக்கு தொடர்வதாக இருந்தால் தெலுங்கு பட அதிபர் மீதுதான் தொடர வேண்டும். ஹன்சிகா எந்த நடவடிக்கை எடுத்தாலும் அது எங்களை கட்டுப்படுத்தாது.
நடிகர் சங்கம் மூலம் எங்களுக்கு எதிராக நடவடிக்கை எடுப்பதை ஹன்சிகா விலக்கி கொள்ள வேண்டும். இல்லையேல் அவர் மீது வழக்கு தொடரப்படும். எங்களுக்கு ஏற்பட்ட நஷ்டத்தை ஹன்சிகாவே ஏற்க வேண்டும் என்று அறிக்கையில் குறிப்பிட்டுள்ளார்.
படத்தை தமிழாக்கம் செய்யும் பொறுப்பேற்றுள்ள ஏ.ஆர்.கே.ராஜராஜா கூறும் போது ரவுடி கோட்டை படத்தில் ஹன்சிகா இச் இச் இச் என்ற ஒரு பாடல் காட்சியில் படுகவர்ச்சியாக நடித்துள்ளார். அதனால்தான் பயந்து போய் தடை கேட்டு இருப்பார் என நினைக்கிறேன் என்றார்.
