இந்திய கிரிக்கெட் அணி அடுத்த மாதம் இலங்கை வருகை தரவுள்ளது. சம்பியன்ஸ் கிண்ணப் போட்டியைத் தொடர்ந்து மேற்கிந்தியத் தீவுகள் செல்லும் இந்திய அணி, அடுத்த மாதம் இலங்கை வருகை தரவுள்ளது.
இந்த விஜயத்தின்போது இருவகை பிரதான கிரிக்கெட் தொடர்களிலும் ஒற்றை சர்வதேச இருபது 20 போட்டியிலும் இலங்கையை இந்தியா எதிர்த்தாடவுள்ளது.
இரண்டு அணிகளுக்கும் இடையில் 3 போட்டிகள் கொண்ட டெஸ்ட் தொடர் ஜூலை 26ஆம் திகதி ஆரம்பமாகவுள்ளது.
முதலாவது டெஸ்ட் போட்டி கண்டி பல்லேகலையில் ஜூலை 26 முதல் 30 வரை நடைபெறவுள்ளது. இரண்டாவது போட்டி காலி சர்வதேச விளையாட்டரங்கில் ஓகஸ்ட் 4முதல் 8ஆம் திகதிவரை நடைபெறும். கடைசி டெஸ்ட் போட்டி கொழும்பு எஸ்.எஸ்.சி. மைதானத்தில் ஓகஸ்ட் 12 முதல் 16ஆம் திகதிவரை நடைபெறும்.
இதனைத் தொடர்ந்து 5 போட்டிகள் கொண்ட சர்வதேச ஒருநாள் கிரிக்கெட் தொடரில் இரண்டு அணிகளும் விளையாடவுள்ளன.
முதலாவது போட்டியும் கடைசிப் போட்டியும் ஆர். பிரேமதாச விளையாட்டரங்கில் ஓகஸ்ட் 20ஆம், செப்டெம்பர் 3ஆம் திகதிகளில் நடைபெறவுள்ளன.
இரண்டாவது போட்டி ரங்கிரி தம்புளை விளையாட்டரங்கில் ஓகஸ்ட் 24ஆம் திகதியும் மூன்றாம், நான்காம் போட்டிகள் பல்லேகலை விளையாட்டரங்கில் ஆகஸ்ட் 27ஆம், 30ஆம் திகதிகளில் நடைபெறவுள்ளன.
இரண்டு அணிகளுக்கும் இடையிலான சர்வதேச இருபது 20 கிரிக்கெட் போட்டி ஆர். பிரேமதாச விளையாட்டரங்கில் செப்டெம்பர் 6ஆம் திகதி நடைபெறவுள்ளது.
இலங்கை வரும் இந்திய அணி, கொழும்பில் ஜூலை 21ஆம், 22ஆம் திகதிகளில் நடைபெறும் 2 நாள் பயிற்சிப் போட்டியில் ஈடுபடும்.
