அமெரிக்க பொருளாதாரம் மிகப் பெரிய ஆபத்தை சந்திக்க வாய்ப்புள்ளதாக உலக வங்கி தலைவர் ஜிம் யெங் கிங் எச்சரிக்கை விடுத்துள்ளார்.
அமெரிக்காவில் நிதி மசோதா நிறைவேறாததால் பல அரசு துறை நிறுவனங்கள் மூடப்பட்டுள்ளன. இந்நிலையில் அமெரிக்கா மிகப் பெரிய ஆபத்தை சந்திக்க வாய்ப்புள்ளதாக உலக வங்கி தலைவர் ஜிம் யெங் கிங் எச்சரிக்கை விடுத்துள்ளார்.
மேலும் கூறுகையில் இந்த அபாயத்தை தடுக்க அமெரிக்க நாடாளுமன்ற உறுப்பினர்கள் தங்களுக்குள் ஒன்றுகூடி விவாதித்து ஏதாவது ஒரு முடிவுக்கு வர வேண்டும். கடன் வரம்பு பிரச்னைக்கு அமெரிக்கா தீர்வு காணாத பட்சத்தில் அது வளரும் நாடுகளை கடுமையாக பாதிக்கும் என்றும் எச்சரித்துள்ளார்.
அமெரிக்க அரசின் கடன் வரம்பு வரும் 17ம் திகதியுடன் நிறைவடைகிறது. அதன் பின்னர் அரசின் செலவினங்களுக்கு நிதி கிடைக்காத சூழ்நிலை ஏற்பட்டுள்ளது. ஆனால் இதுதொடர்பாக அமெரிக்காவின் ஆளும் கட்சிக்கும், எதிர்க்கட்சிக்கும் இடையே கருத்து வேறுபாடுகள் நிலவுவதால் இப்பிரச்னை முடிவுக்கு வராமல் உள்ளது குறிப்பிடத்தக்கது.
