இலங்கைச் சுங்கத்தின் புதிய இயக்குனர் ஜெனரலாக பி.எஸ்.எம்.சார்ள்ஸை அமைச்சரவை நேற்று (26.09) நியமித்துள்ளது.
இலங்கைச் சுங்கத்தின் இயக்குனர் ஜெனரலாக கடந்த இரண்டு வருடங்களாகப் பணியாற்றிய சூலானந்த பெரேராவுக்குப் பதிலாகவே சார்ள்ஸ் நியமிக்கப்பட்டிருப்பதாகவும் அமைச்சரவை தெரிவித்துள்ளது.
மட்டக்களப்பு பிரதேச செயலகத்தின் செயலாளராகக் கடமையாற்றிய சார்ள்ஸ், அரச நிர்வாக சேவையில் இருபத்தாறு வருடங்களாகப் பணிபுரிந்து வருகிறார்.
பி.எஸ்.எம்.சார்ள்ஸ் வவுனியா மாவட்ட அரசாங்க அதிபராகவும் மேலதிக அரசாங்க அதிபராகவும் உதவி அரசாங்க அதிபராகவும் கடமையாற்றியுள்ளார்.
யாழ். பல்கலைக்கழக பட்டதாரியான இவர் ரஜரட்டை மற்றும் பேராதனைப் பல்கலைக்கழகங்களிலும் பட்டப்படிப்பினை மேற்கொண்டவராவார்.
இதேவேளை, சுங்கத் திணைக்கள பணிப்பாளர் நாயகமாகக் கடமையாற்றிய W.A.சூலானந்த பெரேரா, அரச நிர்வாக மற்றும் முகாமைத்துவ அமைச்சின் மேலதிக செயலாளராக நியமிக்கப்பட்டுள்ளதாக அந்த அறிக்கையில் குறிப்பிடப்பட்டுள்ளது.
