அமெரிக்காவின் பல்கலைக்கழக மாணவர் ஒருவருக்கு பிரபல இயற்பியல் விஞ்ஞானி அல்பட் ஐன்ஸ்டீன் எழுதிய இரு கடிதங்கள் 4 லட்சம் டொலர் வரை ஏலம் போகும் என நியூயோர்க் போஸ்ட் பத்திரிக்கை தெரிவித்துள்ளது.
1938ம் ஆண்டு கொலம்பியா பல்கலைக்கழகத்தில் படித்துக்கொண்டிருந்த ஹெர்பர்ட் ஈ சால்ஸர் என்பவர் இயற்பியலில் ஒப்பிணைவு குறித்த ஐன்ஸ்டீனின் கோட்பாட்டில் உள்ள பிழை குறித்து அவருக்கு ஒரு கடிதம் எழுதியிருந்தார்.
அதற்கு பதிலளித்து ஆகஸ்ட் 29ம் திகதி ஒரு கடிதத்தையும் செப்டம்பர் 13ம் திகதி மற்றொரு கடிதத்தையும் ஐன்ஸ்டீன் அனுப்பியிருந்தார்.
இரண்டாவது கடிதத்தில் சால்ஸர் கூறியதுதான் சரி என்றும் தான் தவறு செய்திருந்ததாகவும் பெருந்தன்மையுடன் அவர் ஒப்புக்கொண்டிருந்தார். பிற்காலத்தில் கணிதவியல் வல்லுநராகவும், விஞ்ஞானியாகவும் திகழ்ந்த சால்ஸர் 2006ம் ஆண்டு காலமானார்.
இந்நிலையில் அவரிடமிருந்த ஐன்ஸ்டீனின் இரு கடிதங்களும் வரும் நவம்பர் 7ம் திகதி நியூயோர்க்கிலுள்ள கர்ன்ஸீ ஏல மையத்தில் ஏலத்துக்கு வரவிருப்பதாகவும் அவை 4 லட்சம் டொலர் வரை விலை போகக்கூடும் என்றும் நியூயோர்க் போஸ்ட் பத்திரிக்கை செய்தி வெளியிட்டுள்ளது.
