சரவணன் என்கிற சூர்யா என்ற பெயரில் புது படம் தயாராகிறது. இதை ராஜா சுப்பையா இயக்குகிறார். இப்படத்துக்கு நடிகர் சூர்யா தரப்பில் எதிர்ப்பு கிளம்பியுள்ளது. தலைப்பை மாற்ற வேண்டும் என்று வற்புறுத்தி உள்ளனர்.
சூர்யாவின் நிஜப்பெயர் சரவணன். சினிமாவுக்கு வருவதற்கு முன் இந்த பெயரில்தான் அழைக்கப்பட்டார். நடிகரான பிறகு சூர்யா என மாற்றிக் கொண்டார். எனவே சரவணன் என்கிற சூர்யா பெயரை விளம்பரத்துக்காக படத்தின் தலைப்பாக்கியுள்ளனர் என்று கண்டனங்கள் எழுந்துள்ளன.
சூர்யா ரசிகர்களும் தலைப்பை மாற்றும்படி நிர்ப்பந்தித்து வருகின்றனர். இது குறித்து சூர்யா தரப்பில் கூறும்போது தலைப்பை மாற்றும்படி வற்புறுத்தி நடிகர் சங்கத்தில் புகார் அளித்துள்ளோம். நடிகர் சங்கமும் இதனை தயாரிப்பாளர் சங்கத்துக்கு அனுப்பி நடவடிக்கை மேற்கொண்டு வருகிறது என்றனர்.
ஆனால் இயக்குனர் ராஜா சுப்பையா தலைப்பை மாற்ற முடியாது என மறுத்துவிட்டார். அவர் கூறும்போது எங்கள் படத்துக்கு சரவணன் என்கிற சூர்யா தலைப்பு பொருத்தமாக இருந்ததால் வைத்தோம். படத்தில் நடிகர் சூர்யாவை இழிவு படுத்துவது போல் காட்சிகள் இல்லை. இதே தலைப்பில் வசனங்கள் இடம் பெற்றுள்ளன. நிறைய செலவில் விளம்பரங்களும் செய்துவிட்டோம். தலைப்பை மாற்றினால் எல்லாம் வீணாகிவிடும் என்றார்.
