சீனாவின் 8.5 தொன் எடை கொண்ட விண்கலம் ஒன்று 2018 ஆம் ஆண்டு பூமியை நோக்கி விழும் என்று எதிர்பார்க்கப்படுகிறது. எனினும் இந்த விண்கலம் எங்கு, எப்போது விழும் என்பதை ஆய்வாளர்களால் கணிக்க முடியாதுள்ளது.
2011 செப்டெம்பரில் பூமியின் சுற்றுவட்டப்பாதையில் நிறுவப்பட்ட டியாங்கொங்–1 விண்கலம் 2018 ஜனவரி மாதமளவில் பூமியை நோக்கி விழும் என்று கடந்த ஒக்டோபர் மாதம் அது பற்றி ஆய்வு நடத்திய நிபுணர்கள் கணித்திருந்தனர்.
இந்த விண்கலத்தின் கட்டுப்பாட்டை இழந்து விட்டதை சீன விண்வெளி அதிகாரிகள் 2016 ஆம் ஆண்டு உறுதி செய்தனர். இது 2017 பிற்பகுதி மற்றும் 2018 நடுப்பகுதிக்குள் பூமியை நோக்கி விழும் என்று அந்த அதிகாரிகள் கணித்தனர்.
இந்த விண்கலம் அட்சயரேகையின் 43 பாகை வடக்கும் மற்றும் 43 தெற்கு பகுதியால் மீண்டும் பூமிக்குள் நுழையும் என்று ஆய்வாளர்கள் தீர்மானித்துள்ளனர். இது நடுக் கடல் பகுதியாகும். எனினும் இதன் பாகங்கள் மனிதர் வாழும் பகுதியில் விழுவதற்கு 10,000இல் ஒரு வாய்ப்பு இருப்பதாக கணிக்கப்பட்டுள்ளது.
