வவுனியாவில்…
வவுனியாவில் பணம் தருவதாகக் கூறி நூதனமான முறையில் பொதுமக்களை ஏமாற்றும் சம்பவங்கள் பதிவாகி வருவதாகப் பாதிக்கப்பட்டோர் தெரிவிக்கின்றனர். குறித்த சம்பவம் தொடர்பாகப் பாதிக்கப்பட்டோர் தெரிவிக்கையில்,
குறிப்பாகக் கிராமப்புறங்களில் வசிப்பவர்கள் மற்றும் பெண் தலைமைத்துவ குடும்பங்களின் தொலைபேசி இலக்கங்களைப் பெற்றுக்கொள்ளும் மர்ம நபர்கள் அவர்களிற்கு அழைப்பை ஏற்படுத்தி அவர்களது குடும்பச் சூழல் தொடர்பாக விசாரித்து அனுதாபம் தெரிவிக்கின்றனர்.
பின்னர் அவர்களிற்குப் பண உதவி செய்வதாகத் தெரிவித்து நம்ப வைப்பதுடன் பணத்தினை உங்களுக்கு வழங்க வேண்டுமானால் சிறுதொகை பணத்தினை ez காஸ் மூலம் தமது தொலைபேசி இலக்கத்திற்கு அனுப்பி வைக்குமாறு தெரிவித்துள்ளனர்.
பணத்தினை அனுப்பிய சற்றுநேரத்தில் உங்களது பணம் வங்கிக் கணக்கில் வைப்பிலிடப்படும் என்று நம்பவைத்துள்ளனர். இதனை நம்பி பலர் 3ஆயிரம் தொடக்கம் 5ஆயிரம் ரூபாய் வரையிலான பணத்தினை ez காஸ் மூலம் அவர்களிற்கு அனுப்பியுள்ளனர்.
அதன் பின்னர் குறித்த நபர்களின் தொலைபேசி இலக்கம் நிறுத்தப்பட்ட நிலையில் தாம் ஏமாற்றப்பட்டுள்ளதை பின்னரே உணர்ந்துள்ளனர்.
குறித்த சம்பவங்கள் வவுனியாவின் கிராமப் புறங்களில் அதிகமாகப் பதிவாகி வருகின்ற நிலையில் பொதுமக்கள் இந்த விடயத்தில் அவதானமாக இருக்குமாறு தெரிவிக்கப்பட்டுள்ளது.
-தமிழ்வின்-
