அவுஸ்ரேலியாவில்..
செய்திகளைப் பகிர்வதற்காக கூகுள், முகப்புத்தகம் போன்ற தொழில்நுட்ப நிறுவனங்கள் கட்டணம் செலுத்துவதைக் கட்டாயமாக்கும் சர்ச்சைக்குரிய சட்டத்தை அவுஸ்ரேலிய நாடாளுமன்றம் நிறைவேற்றியுள்ளது.
பிற ஊடகங்களில் வெளியிடப்படும் செய்திகளைப் பகிரும் தகவல் தொழில்நுட்ப நிறுவனங்கள், அதற்கான கட்டணத்தை அந்த ஊடக நிறுவனங்களுக்கு அளிப்பதைக் கட்டாயமாக்கும் சட்டத்தை அவுஸ்ரேலிய நாடாளுமன்றக் கீழவையான பிரதிநிதிகள் சபை நேற்று நிறைவேற்றியுள்ளது.
இதையடுத்து, பிற ஊடகங்களின் செய்திகளைப் பகிர்ந்து வரும் அமெரிக்க தகவல் தொழில்நுட்ப நிறுவனங்களான கூகுள், முகப்புத்தகம் ஆகியவை அதற்கான கட்டணத்தைச் செலுத்தியாக வேண்டிய நிலை ஏற்பட்டுள்ளது.
ஏற்கெனவே, இந்தச் சட்டத்துக்கு தகவல் தொழில்நுட்பத் துறையில் உலகம் முழுவதும் ஆதிக்கம் செலுத்தி வரும் கூகுளும், முகப்புத்தக நிறுவனங்களும் கடும் எதிர்ப்பு தெரிவித்து வருகின்றன.
தங்களது எதிப்பை வெளிப்படுத்தும் வகையில், அவுஸ்ரேலியாவில் செய்திகளைப் பகிர்வதற்கு முகப்புத்தகம் நிறுவனம் தடை விதித்தது. இதன் மூலம், அரசாங்கத்தினன் சமூக வலைதள நடவடிக்கைகளும் பாதிக்கப்பட்டன.
இதனைத் தொடர்ந்து முகப்புத்தகத்துக்கும் அவுஸ்ரேலிய அரசாங்கத்துக்கும் இடையே நடைபெற்ற தீவிர பேச்சுவார்த்தைக்குப் பிறகு, சர்ச்சைக்குரிய சட்டத்தில் சில திருத்தங்களை மேற்கொள்ள அரசாங்கம் தரப்பில் ஒப்புக்கொள்ளப்பட்டது.
இதையடுத்து, விளம்பரங்களைப் பகிர்வதற்கு விதித்திருந்த தடையை முகப்புத்தகம் விலக்கிக் கொண்டது. இந்தச் சூழலில், கட்டாய கட்டணச் சட்டத்துக்கு பிரதிநிதிகள் சபை இறுதி வடிவம் கொடுத்துள்ளது.
இதுவரை பிற ஊடகங்களின் செய்திகளை எந்தவித சிக்கலையும் எதிர்கொள்ளாமல் பகிர்ந்து, அதன் மூலம் வருவாய் ஈட்டி வந்த கூகுள், முகப்புத்தகம் ஆகிய நிறுவனங்கள் அவுஸ்ரேலியாவில் கட்டாய விளம்பரக் கட்டணச் சட்டத்தை முதல்முறையாக எதிர்கொண்டுள்ளது.
