சிறுவர் நன்னடத்தை பராமரிப்பு இல்லத்தில் சிறுவன் அடித்துக் கொலை : மேற்பார்வையாளர் கைது!!

மட்டக்களப்பில்..

மட்டக்களப்பில் கோவில் மணியை திருடிய குற்றச்சாட்டில் கைது செய்யப்பட்டு கல்முனை சிறுவர் பராமரிப்பு இல்லத்தில் ஒப்படைக்கப்பட்ட 14 வயதுடைய சிறுவன் ஒருவர் மீது இல்லத்தின் மேற்பார்வையாளர் தாக்குதலில் சிறுவன் உயிரிழந்த சம்பவம் தொடர்பாக அந்த பெண் மேற்பார்வையாளரை நேற்று சனிக்கிழமை (02) கைது செய்துள்ளதாக கல்முனை பொலிசார் தெரிவித்தனர்.

மட்டக்களப்பு கொக்குவில் எல்லை வீதியைச் சேர்ந்த 14 வயதுடைய நாராயண ஆனந்ததேவன் தர்சாத் என்ற சிறுவனே இவ்வாறு உயிரிழந்துள்ளார். கடந்த நவம்பர் 16 ஆம் திகதி கொக்குவில் கொம்புமுறிச்ச சந்தி பிள்ளையார் ஆலையத்தில் உள்ள 3 விளக்கு, மணி ஒன்று , தீபம்காட்டும் தீபம் ஒன்று உட்பட்ட வென்கலத்திலான பொருட்களை திருடிய சம்பவம் தொடர்பாக குறித்த சிறுவனையும் பூசாரி ஒருவரையும் பிரதேச மக்கள் பிடித்து கொக்குவில் பொலிசாரிடம் ஒப்படைத்தனர்.

இதில் கைது செயயப்பட்ட இருவரையும் 17 ஆம் திகதி மட்டக்களப்பு நீதவான் நீதிமன்றில் ஆஜர்படுத்தப்பட்டபோது குறித்த சிறுவனை சிறுவர் நன்னடத்தை பராமரிப்பு நிலையத்தில் ஒப்படைக்குமாறும் பூசாரியை விளக்கமறியலில் வைக்குமாறும் நீதவான் உத்தரவிட்டார்.

இதனையடுத்து குறித்த சிறுவனை கல்முனை சிறுவர் இல்ல வீதியில் உள்ள கிழக்கு மாகாண சிறுவர் நன்னடத்தை பராமரிப்பு நிலையத்தில் ஒப்படைக்கப்பட்ட நிலையில் சம்பவதினமான நவம்பர் 30 ஆம் திகதி குறித்த இல்லத்திலுள்ள கூண்டில் சிறுவன் உயிரிழந்துள்ளார்.

பராமரிப்பு நிலையத்தில் சிறுவன் தொடர்ச்சியாக அநாகரிகமாக நடந்து கொண்டதையடுத்து இல்ல பெண் மேற்பார்வையாளர் கோபமுற்று சிறுவன் மீது பொல்லால் தாக்கி அவரை கூண்டில் அடைத்ததாகவும் அதன் பின்னர் குறித்த சிறுவன் உயிரிழந்ததாகவும் பொலிசாரின் ஆரம்ப கட்ட விசாரணையில் தெரியவந்துள்ளது .

இது தொடர்பாக தடயவியல் பொலிஸ் பிரிவினர் அழைக்கப்பட்டு விசாரணைகள் இடம்பெற்றதுடன் சம்பவ இடத்திற்கு நீதவான் சென்று பார்வையிட்டு சடலத்தை பிரேத பரிசோதனைக்கு உட்படுத்துமாறு உத்தரவிட்டதையடுத்து,

சடலம் கல்முனை அஷ்ரப் ஞாபகார்த்த ஆதார வைத்தியசாலையில் ஒப்படைக்கப்பட்டு பிரேத பரிசோதனையில் சிறுவன் மீது அடியாயங்கள் உள்ளதாகவும் தாக்குதலால் உயிரிழந்துள்ளதாக தெரியவந்துள்ளதையடுத்து குறித்த சிறுவர் பராமரிப்பு இல்ல பணிப்பாளரை நேற்று சனிக்கிழமை (02) கைது செய்தனர்.

சிறுவனின் சடலம் பெற்றோரிடம் ஒப்படைக்கப்பட்டுள்ளதுடன் இது தொடர்பான மேலதிக விசாரணைகளை கல்முனை தலைமையக பொலிசார் மேற்கொண்டுவருகின்றனர்.

இதேவேளை உயிரிழந்த சிறுவனின் பெற்றோர் தனது மகனை பொல்லால் தாக்கி கொலை செய்துள்ளதாகவும் பொலிசார் மற்றும் சிறுவர் நன்னடத்தை அதிகாரிகள் எனது மகனின் உயிரிழப்புக்கு நீதி வேண்டும் எனது மகனை கொன்றவர்களுக்கு தண்டனை வழங்கவேண்டும் என தெரிவித்தனர்.