ஷங்கர் இயக்கத்தில் விக்ரம் நடித்து வரும் ‘ஐ’ படத்தின் போஸ்டர், டிரெய்லர் எப்போது என்பது தான் பெரும் எதிர்பார்ப்பாக இருந்து வருகிறது. ஆனால், அதற்கு இன்னும் பல காலம் ஆகும் என்பது மட்டும் உறுதியாகத் தெரிகிறது.
மிகவும் உடல் மெலிந்து காணப்பட்ட விக்ரம் பொது நிகழ்ச்சிகளில் கலந்து கொண்டே ‘ஐ’ படத்தில் நடித்து வந்தார். இந்த நிலையில், கடந்த 2 மாதங்களாக விக்ரமை எந்த பொது நிகழ்ச்சியிலும் காண முடியவில்லை.
அதுமட்டுமன்றி ஜி.வி.பிரகாஷின் திருமணத்தில் கூட விக்ரம் கலந்து கொள்ளவில்லை. தொலைபேசி மூலமாக தனது வாழ்த்தை தெரிவித்தார். விக்ரம் என்ன செய்து கொண்டு இருக்கிறார் என்று விசாரித்ததில் சில ஆச்சர்ய தகவல்கள் கிடைத்தன.
‘ஐ’ படத்தில் 85 வயது முதியவர் வேடம் ஒன்று இருக்கிறதாம். அதுவும் அந்த வேடத்தில் உடம்பை ஏற்றி ஜிம் போய்(Gym Boy) மாதிரி இருக்க வேண்டும் என்று உத்தரவு போட்டு இருக்கிறாராம் ஷங்கர்.
இதற்காக எந்த நேரம் பார்த்தாலும் ஜிம்மே கதி என்று இருக்கிறாராம் விக்ரம். ஜிம் விட்டால் வீடு, வீட்டை விட்டால் படப்பிடிப்பு என்று கடந்த 3 மாதங்களாக இருந்து வருகிறார் விக்ரம்.
இந்த உடலமைப்போடு எந்த ஒரு பொது நிகழ்ச்சிக்கோ, குடும்ப நிகழ்ச்சிக்கோ செல்ல வேண்டாம் என்று உத்தரவு பிறப்பித்து இருக்கிறாராம் ஷங்கர்.
