2014 ஆம் ஆண்டிற்கான உலக அழகிப் பட்டத்தை 22 வயதான, தென்னாபிரிக்க அழகி ரோலன் ஸ்ட்ராஸ் தட்டிச் சென்றார். 64 வது உலக அழகிப் போட்டி லண்டனில் நேற்று நடைபெற்றது. இதில் 121 நாடுகள் பங்கேற்றன.
நேற்று நடந்த இறுதி அலங்கார அணிவகுப்பில் உலக அழகிக்கான மகுடம் அவருக்கு சூட்டப்பட்டது. இந்த நிகழ்ச்சியை உலகம் முழுவதும் 100 கோடி பேர் தொலைக்காட்சியில் கண்டு களித்திருக்கலாம் என்று மதிப்பிடப்படுகிறது.
பட்டம் அறிவிக்கப்பட்டதும் ஆச்சர்யம் அடைந்த ஸ்ட்ராஸ் கைகளைத் தட்டி தன் சந்தோஷத்தை வெளிப்படுத்தினார். அவருக்கு ”மிஸ் வேல்ட்” என்ற எழுத்துக்கள் கொண்ட ரிபனை, கடந்த வருடம் உலக அழகி பட்டம் வென்ற பிலிப்பைன்ஸ் நாட்டு உலக அழகி மேகன் யங் அணிவித்தார்.
பட்டம் பெற்ற ஸ்ட்ராஸ் “தென் ஆபிரிக்காவே இது உனக்காக” என்று கூறினார். இந்தப் புகழ், தனக்கு மிகப்பெரிய பொறுப்பு என அவர் தெரிவித்தார்.
