நட்சத்திர கிரிக்கெட் போட்டியில் மும்பையை வீழ்த்தி சென்னை அணி அபார வெற்றி!!

மும்பை ஹீரோஸ் அணிக்கு எதிரான டி20 போட்டியில் சென்னை ரைனோஸ் அணி 9 விக்கெட் வித்தியாசத்தில் அபார வெற்றி பெற்றது.

திரைநட்சத்திரங்கள் பங்கேற்கும் நட்சத்திர கிரிக்கெட் போட்டியில் சென்னை- மும்பை அணிகள் இன்று அகமதாபாத்தில் மோதின. நாணய சுழற்சியில் வென்ற சென்னை அணி களத்தடுப்பை தெரிவு செய்தது. அதன் படி மும்பை அணி துடுப்பெடுத்தாட களமிறங்கியது.

இதில் முதலில் துடுப்பெடுத்தாடிய மும்பை அணி 20 ஓவர் முடிவில் 6 விக்கெட் இழப்பிற்கு 157 ஓட்டங்கள் குவித்தது. ராஜா பிர்வானி 49 ஓட்டங்களில் அரைசத்தை தவறவிட்டார். கோச்சஹர் 30 ஓட்டங்கள் எடுத்தார்.

பின்னர் 158 ஓட்டங்கள் எடுத்தால் வெற்றி என்ற இலக்கை நோக்கி சென்னை அணி விளையாடியது. தொடக்க ஆட்டக்காரர் ரமணா அதிரடி காட்ட 25 ஓட்டங்களில் ஆட்டமிழந்தார். பின்னர் ஜோடி சேர்ந்த விக்ராந் மற்றும் விஷ்ணு அதிரடியாக விளையாடி அணியை வெற்றி பெறச் செய்தனர்.

விக்ராந் 49 பந்துகளில் 63 ஓட்டங்களும், விஷ்ணு 32 பந்துகளில் 52 ஓட்டங்களும் குவித்து கடைசி வரை ஆட்டமிழக்காமல் இருந்தனர். அதிரடியாக விளையாடிய விக்ராந் ஆட்டநாயகனாக தெரிவு செய்யப்பட்டார்.