உலகக்கிண்ண பயிற்சி ஆட்டத்தில் இந்திய அணி படுதோல்வி!!

உலகக் கிண்ணப் போட்டிகளுக்கு முந்தைய பயிற்சிப் போட்டிகள் இன்று ஆரம்பமாகின. இன்று நடந்த முதல் போட்டியில் இந்தியாவை, அவுஸ்திரேலிய அணி 106 ஓட்ட வித்தியாசத்தில் தோற்கடித்தது.

அடிலைடில் நடந்த இப் போட்டியில் இந்திய- அவுஸ்திரேலிய அணிகள் மோதின. இதில் நாணய சுழற்சியில் வெற்றி பெற்ற அவுஸ்திரேலிய அணி முதலில் துடுப்பெடுத்தாட்டத்தை தேர்வு செய்தது.

இந்தியப் பந்து வீச்சை வழக்கம் போல அவுஸ்திரேலிய அணி வீரர்கள் பொறித்து எடுத்து விட்டனர். அவுஸ்திரேலிய அணி சார்பாக டேவிட் வோர்னர் 83 பந்துகளில் 104 ஓட்டங்களையும், கிளன் மேக்ஸ்வெல் 57 பந்துகளில் 122 ஓட்டங்களையும் பெற்றுக்கொண்டனர்.

அவுஸ்திரேலிய அணி 48.2 ஓவர்களில் சகல விக்கட்டுகளையும் இழந்து 371 ஓட்டங்களைப் பெற்றுக்கொண்டது.

இதனைத் தொடர்ந்து மிகப் பெரிய இலக்கைத் துரத்திய இந்திய அணி 45.1 ஓவர்களில் 265 ஓட்டங்களுக்கு சகல விக்கட்டுகளையும் இழந்து 106 ஓட்டங்களால் தோல்வியைத் தழுவியது.

இந்திய அணி சார்பாக சிகர் தவான் 59 ஓட்டங்களையும், ரஹானே 66 ஓட்டங்களையும் அம்பட்டி ராயுடு 53 ஓட்டங்களையும் பெற்றுக் கொண்டனர்.