ஸ்கொட்லாந்து அணியை வீழ்த்தி வங்கதேச அணி அபார வெற்றி!!

ஸ்கொட்லாந்து அணிக்கு எதிரான உலகக்கிண்ண லீக் போட்டியில், கடின இலக்கை விரட்டிய வங்கதேச அணி 6 விக்கெட் வித்தியாசத்தில் அபார வெற்றி பெற்றது.

நியூசிலாந்தின் நெல்சன் நகரில், வங்கதேசம், ஸ்கொட்லாந்து அணிகள் மோதிய உலகக்கிண்ணத்திற்கான ‘ஏ’ பிரிவு லீக் போட்டி இன்று நடைபெற்றது. இதில் நாணய சுழற்சியில் வெற்றிபெற்ற வங்கதேச அணித்தலைவர் மொர்டசா, களத்தடுப்பை தெரிவு செய்தார்.

அதன் படி முதலில் துடுப்பெடுத்தாடிய ஸ்கொட்லாந்து அணி சார்பாக மட் மக்கான் 35 ஓட்டங்களையும், அணித்தலைவர் மம்சன் 39 ஓட்டங்களையும், அபாரமாக ஆடிய தொடக்க வீரர் கைல் கோட்ஜெர், ஒருநாள் அரங்கில் தனது 2வது சதத்தை பதிவு செய்தார். இவர், 134 பந்தில் 156 ஓட்டங்களை பெற்றுக்கொண்டனர்.

ஸ்கொட்லாந்து அணி 50 ஓவரில் முடிவில் 8 விக்கெட்டுகள் இழப்பிற்கு 318 ஓட்டங்கள் குவித்தது. வங்கதேசம் சார்பில் டஸ்கின் அகமட் 3 விக்கெட்டுகளையும், நசிர் ஹொசைன் 2 விக்கெட்டுகளையும் கைப்பற்றினர்.

இதைத் தொடர்ந்து 319 ஓட்டங்கள் என்ற கடின இலக்கை விரட்டிய வங்கதேச அணிக்கு பொறுப்பாக ஆடிய தமிம் இக்பால் 95 ஓட்டங்களையும் , மகமதுல்லா 62 ஓட்டங்களையும், முஷ்பிகுர் ரஹிம் 60 ஓட்டங்களையும், சகிப் அல் ஹசன் ஆட்டமிழகாமல் 52 ஓட்டங்களையும் , சபீர் ரஹீம் ஆட்டமிழகாமல் 42 ஓட்டங்களையும் பெற்று அணியை வெற்றிப் பாதைக்கு இட்டுச் சென்றனர்.

வங்கதேசத்தின் பொறுமையான ஆட்டத்தால் அந்த அணி 48.1 ஓவர்களிலே இலக்கை எட்டி 322 ஓட்டங்கள் குவித்து வெற்றி பெற்றது.

ஸ்கொட்லாந்து அணி சார்பில் ஜோஷ் டாவே 2 விக்கெட்டுகளையும், வர்ட்லா, அலாஸ்டர் தலா ஒரு விக்கெட்டையும் வீழ்த்தினார். 156 ஓட்டங்கள் குவித்த கோட்ஜெர் ஆட்டநாயகனாக தெரிவு செய்யப்பட்டார்.