இலங்கைக்கு எதிரான இன்றைய போட்டியில் 64 ஓட்டங்களால் அவுஸ்திரேலிய அணி வெற்றி பெற்றுள்ளது. உலகக் கிண்ண லீக் போட்டிகளில் 32வது போட்டியாக இன்று அவுஸ்திரேலியா மற்றும் இலங்கை அணிகள் மோதின.
சிட்னியில் இடம்பெற்ற இந்தப் போட்டியில் நாணயசுழற்சியில் வெற்றிபெற்ற அவுஸ்திரேலிய அணி முதலில் துடுப்பெடுத்தாடத் தீர்மானித்தது.
இதன்படி களமிறங்கிய அந்த அணியின் ஆரம்ப துடுப்பாட்ட வீரர்களான ஆரோன் பின்ச் 29 ஓட்டங்களுடனும் டேவிட் வோனர் 9 ஓட்டங்களுடனும் ஆட்டமிழந்து ஏமாற்றமளித்தனர்.
எனினும் அதன் பின்னர் வந்த ஸ்டீவன் ஸ்மித் (72), மைக்கல் கிளார்க் (62), மெக்ஸ்வெல் (102), வோட்சன் (67) ஆகியோர் அதிரடியாக ஆடி ஓட்டங்களைக் குவித்தனர்.
குறிப்பாக மெக்ஸ்வெல் 53 பந்துகளை மட்டுமே எதிர்கொண்டு, 10 பவுண்டரிகள், நான்கு சிக்சர்கள் அடங்களாக 102 ஓட்டங்களை விளாசினார்.
இதனையடுத்து 50 ஓவர்கள் நிறைவில் 9 விக்கெட்டுக்களை இழந்த ஆஸி. 376 ஓட்டங்களை பெற்றுக் கொண்டது.
பந்து வீச்சில் லசித் மலிங்க மற்றும் திஸர பெரேரா ஆகியோர் தலா இரண்டு விக்கெட்டுக்களை வீழ்த்தினர்.
இதனையடுத்து 377 என்ற கடினமான இலக்குடன் களமிறங்கிய இலங்கை அணிக்கு ஒரு ஓட்டத்தை மட்டுமே பெற்ற நிலையில் ஆட்டமிழந்து ஆரம்ப துடுப்பாட்ட வீரர் லகிரு திரிமானே அதிர்ச்சியளித்தார்.
எனினும் அடுத்ததாக களமிறங்கிய குமார் சங்கக்கார, மற்றுமொரு ஆரம்ப துடுப்பாட்ட வீரரான டில்ஷானுடன் இணைந்து சிறப்பான துடுப்பாட்டத்தை வௌிப்படுத்தினார்.
பின் 62 ஓட்டங்களுடன் டில்ஷான் வௌியேற, சதமடித்த கையோடு 104 ஓட்டங்களைப் பெற்ற நிலையில் சங்கக்காரவும் ஆட்டமிழந்தார்.
அடுத்ததாக துடுப்பெடுத்தாட வந்த தினேஸ் சந்திமால் அதிரடியாக ஆடி இலங்கை இரசிகர்களுக்கு விருந்தளித்த போதும், அவரது ஆட்டம் நீண்ட நேரம் நீடிக்கவில்லை.
24 பந்துகளில் எட்டு பவுண்டரிகள் ஒரு சிக்சர் அடங்களாக 52 ஓட்டங்களைப் பெற்ற போது சந்திமால் காயமடைந்த நிலையில் மைதானத்தை விட்டு வௌியேற வேண்டிய நிலை ஏற்பட்டது.
பின்னர் வந்த வீரர்கள் எவரும் அவ்வளவாக சோபிக்காத நிலையில் 46.2 ஓவர்களில் சகல விக்கெட்டுக்களையும் இழந்த இலங்கை அணி (9 விக்கெட்டுக்கள்) 312 ஓட்டங்களை மட்டுமே பெற்றது.
இதன்படி 64 ஓட்டங்களால் அவுஸ்திரேலிய அணி வெற்றியைத் தனதாக்கியது.
பந்து வீச்சில் ஜேம்ஸ் பால்க்னர் மூன்று விக்கெட்டுக்களையும், மிட்செல் ஸ்டார்க் மற்றும் மிச்சல் ஜோன்சன் ஆகியோர் தலா இரண்டு விக்கெட்டுக்களையும் வீழ்த்தினர்.
போட்டியின் சிறப்பாட்டக்காரராக மெக்ஸ்வெல் தெரிவானார்.
