ஐரோப்பிய கால்பந்து கூட்டமைப்பின் சிறந்த கால்பந்து வீரர் விருதுக்கு, மெஸ்சி, ரொனால்டோ உள்ளிட்ட 10 முன்னணி வீரர்களின் பெயர்கள் பரிந்துரை செய்யப்பட்டுள்ளது.
கடந்த 2011 ஆண்டு முதல் ஐரோப்பிய கால்பந்து கூட்டமைப்பில் இடம் பெற்றுள்ள கழக அணிகளில் சிறந்து விளங்கும் வீரர்களுக்கு ஆண்டு தோறும் சிறந்த வீரருக்கான விருது வழங்கப்படும்.
இவ்விருதை 2011ல் பார்சிலோனா அணிக்காக பங்கேற்ற மெஸ்சி தட்டிச்சென்றார். 2012ல் பார்சிலோனாவின் இனியஸ்டா வென்றார்.
இந்த ஆண்டு கழக அணிகளில் சிறப்பாக செயல்பட்ட 10 வீரர்கள் கொண்ட பட்டியல் தற்போது வெளியிடப்பட்டது.
இதில் மெஸ்சி (பார்சிலோனா), கிறிஸ்டியானோ ரொனால்டோ (ரியல் மட்ரிட்), கெராத் பேல் (டாட்டன்ஹாம்), இப்ராகி மோவிச் (பாரிஸ் செண்ட் ஜெர்மியான்), ரோபர்ட் லீவான்டோவிச் (போரிஸ் டிராட்மண்ட்), ரொபின் வான் பெர்சி (மன்செஸ்டர் யுனைடெட்) ஆகியோர் இடம் பெற்றுள்ளனர்.
இவர்களை தவிர பேயர்ன் முனிக் அணியின் தோமஸ் முல்லர், பிரான்க் ரிபரி, அர்ஜன் ராபன், பாஸ்டின் ஆகியோரும் பட்டியலில் இடம் பிடித்துள்ளனர்.
சிறந்த வீரருக்கான விருது வரும் ஒகஸ்ட் 29ம் திகதி மொனாகோவில் நடக்கும் சம்பியன்ஸ் லீக் தொடரின் அட்டவணை அறிவிப்பின் போது வழங்கப்படும்.
