ஐக்கிய அரபு எமிரேட்சை வீழ்த்திய மேற்கிந்திய தீவுகள் அணி காலிறுதிக்குள் நுழையும் வாய்ப்பை தக்கவைத்து!!

உலகக் கிண்ண கிரிக்கெட் லீக் போட்டியில் ஐக்கிய அரபு எமிரேட்ஸ் அணிக்கு எதிரான ஆட்டத்தில் மேற்கிந்திய தீவுகள் 6 விக்கெட் வித்தியாசத்தில் வெற்றி பெற்று காலிறுதி வாய்ப்பை பெற்றுள்ளது.

எனினும் பாகிஸ்தான் அயர்லாந்து போட்டி முடிவிலேயே மேற்கிந்திய அணியின் காலிறுதி வாய்ப்பு உறுதிப்படுத்தப்படும்.

14 அணிகள் இடையிலான 11ஆவது உலகக் கிண்ண கிரிக்கெட் போட்டியில் இன்றுடன் லீக் சுற்று முடிவடைகிறது.

இன்று நடக்கும் கடைசி சுற்று லீக் ஆட்டம் ஒன்றில் மேற்கிந்திய தீவுகள்-ஐக்கிய அரபு எமிரேட்ஸ் அணிகள் நேப்பியரில் மோதின. மேற்கிந்திய தீவுகள் அணியை பொறுத்தவரை இந்த ஆட்டத்தில் கட்டாயம் வென்றாக வேண்டும் என்ற நிலையிலே ஆட்டம் தொடங்கியது. போட்டியில் நாணய சுழற்சியில் வென்ற மேற்கிந்திய தீவுகள் முதலில் களத்தடுப்பை தேர்வு செய்தது.

இதனையடுத்து முதலில் துடுப்பெடுத்தாடிய ஐக்கிய அரபு எமிரேட்ஸ், மேற்கிந்திய தீவுகள் பந்துவீச்சில் திணறியது.

47.4 ஓவர்களில் அனைத்து விக்கெட்களையும் இழந்து 175 ஓட்டங்களை மாத்திரமே எடுத்தது. ஐக்கிய அரபு எமிரேட்ஸ் அணியில் அதிகப்பட்சமாக நசீர் அஸிஸ் 60 ஓட்டங்களையும் ஜாவேத் 56 ஓட்டங்களையும் எடுத்தனர்.

மற்றவர்கள் யாரும் சொல்லும்படியாக ஓட்டங்களை எடுக்கவில்லை. 176 ஓட்டங்கள் என்ற வெற்றி என்ற இலக்குடன் மேற்கிந்திய தீவுகள் களமிறங்கியது.

மேற்கிந்திய தீவுகள் அணியின் தொடக்க ஆட்டக்காரர் சுமித் 15 ஓட்டங்களுடனும், சார்லஸ் 55 ஓட்டங்களுடனும் ஆட்டமிழந்தனர். சாமுவேல் 9 ஓட்டங்களுடன் அரங்கு திரும்பினார். அதிரடியாக சிக்சர் அடித்து ஆட்டத்தை தொடங்கிய ரூஸ்செல் 7 ஓட்டங்களுடன் ஏமாற்றினார்.

மேற்கிந்திய தீவுகள் 30.3 ஓவர்களுக்கு 4 விக்கெட் இழப்பிற்கு 176 ஓட்டங்களை எடுத்து, 6 விக்கெட்கள் வித்தியாசத்தில் வெற்றி பெற்றது. இறுதியில் கார்டர் 50 ஓட்டங்களுடனும், ராம்டின் 33 ஓட்டங்ககளுடனும் களத்தில் இருந்தனர்.

விளையாடிய அனைத்து போட்டிகளிலும் தோல்வி அடைந்து ஐக்கிய அரபு எமிரேட்ஸ் போட்டிகளில் இருந்து வெளியேறியது.