அடுத்த ஆண்டு பிரேசிலில் நடைபெறவுள்ள உலகக் கோப்பை கால்பந்து போட்டிகளுக்கான நுழைவுச் சீட்டு விலைகள் அறிவிக்கப்பட்டுள்ளன.
இதற்கான அதிகாரபூர்வமான அறிவிப்பை சர்வதேச கால்பந்து சம்மேளனமான ஃபிஃபா வெள்ளிக்கிழமை அறிவித்தது.
உலகெங்குமுள்ள கால்பந்து ரசிகர்கள் இப்போட்டிகளை கண்டுகளிக்க சுமார் முப்பது லட்சம் நுழைவுச் சீட்டுகள் விற்கப்படவுள்ளன.
இந்த டிக்கெட்டுகளின் விற்பனை இந்த ஆண்டு ஆகஸ்ட் மாதத்தின் பிற்பகுதியிலிருந்து தொடங்கும்.
அதிக ஆர்வம் இருக்காது என்று கருதப்படும் ஆரம்பகட்ட போட்டிகளை காணவரும் வெளிநாட்டு ரசிகர்களுக்கு, டிக்கெட்டுகள் 90 டாலர்கள் தொடக்கம் கிடைக்கும். ஆனால் இறுதிப் போட்டிகளுக்கோ இந்தக் கட்டணம் ஆயிரம் டாலர்கள் வரை இருக்கும்.
ஆனால் வழக்கம் போல போட்டிகளை நடத்தும் நாடான பிரேசிலில் உள்ளவர்களுக்கு நுழைவுச் சீட்டுக் கட்டணங்களில் சலுகைகள் உண்டு.
அந்நாட்டினருக்கு மட்டும் நான்கு லட்சம் டிக்கெட்டுகள் ஒதுக்கப்பட்டுள்ளன.
உள்நாட்டில் போட்டிகளைக் காண விரும்பும் சில ரசிகர்களுக்கு மிகக் குறைந்த கட்டணமாக 15 டாலர்கள் நிர்ணயிக்கப்பட்டுள்ளது.
மாணவர்கள், முதியவர்கள் அல்லது அரசின் நலத்திட்டங்களை நம்பியுள்ளவர்களுக்கே இந்தக் குறைந்த விலையான 15 டாலர் கட்டண டிக்கெட்டுகள்.
கடந்த முறை தென் ஆப்ரிக்காவில் போட்டிகள் நடைபெற்ற போது இதே போன்ற மக்களுக்கு நிர்ணயிக்கப்பட்ட கட்டணத்தைவிட இது ஐந்து டாலர்கள் குறைவு.
இதன் மூலம் ஃபிஃபாவும், பிரேசில் உலகக் கோப்பை போட்டிகளின் ஏற்பாட்டுக் குழுவினரும், 2014 ஆம் ஆண்டு போட்டிகளுக்கான டிக்கெட் கட்டணங்கள்தான் இதுவரை இருந்துள்ளதிலேயே மிகக் குறைவானவையாக இருக்கும் என்று அளித்துள்ள வாக்குறுதியை நிறைவேற்றியுள்ளனர் என்று பிபிசியின் பிரேசில் செய்தியாளர் கூறுகிறார்.
அனைத்து டிக்கெட்டுகளும் எதிர்வரும் ஆகஸ்ட் மாதம் 24 ஆம் தேதி முதல் ஃபிஃபா.காம் எனும் இணையதளத்தின் மூலமே விற்பனை செய்யப்படும் எனவும் அறிவிக்கப்பட்டுள்ளது.
