விஜய் – அமலா பால் நடிப்பில் உருவாகியுள்ள படம் தலைவா. தெய்வத் திருமகள், தாண்டவம் படங்களின் இயக்குநர் விஜய் இந்தப் படத்தை இயக்கி உள்ளார். ஜி.வி.பிரகாஷ் இசை அமைத்துள்ளார். சத்யராஜ், சந்தானம் ஆகியோர் முக்கியக் கதாபாத்திரத்தில் நடித்துள்ளனர்.
விஜய்யின் அரசியல் வாழ்க்கைக்கு அச்சாரமிடும் படம் என்று சொல்லப்படுவதாலும் பாடல்கள் ஹிட்டாகி இருப்பதாலும் படத்துக்கு ஏகப்பட்ட எதிர்பார்ப்பு நிலவுகிறது. படத்தை ரம்லானுக்கு வெளியிடும் திட்டத்தில் உள்ளது படக்குழு. தணிக்கை சான்றிதழ் கிடைத்ததும் ரிலீஸ் தேதியை அதிகாரப்பூர்வமாக அறிவிக்கலாம் என்று நினைத்தனர்.
படத்தைப் பார்த்த சென்சார் போர்ட் அதிகாரிகள் யு/ஏ சான்றிதழ் கொடுத்துள்ளனர். ஆனால், யு சான்றிதழ் கிடைத்தால் 30 சதவிகிதம் வரிவிலக்கு கிடைக்கும் என்பதால் மறுதணிக்கைக்கு அனுப்பி இருக்கிறார்களாம்.
காரணம், மிகப்பெரிய பட்ஜெட்டில் தயாரிக்கப்பட்டுள்ளது இந்தப் படம். வரிவிலக்கு கிடைத்தால் நன்றாக இருக்கும் எனக் கருதினாராம் தயாரிப்பாளர். சமீபத்தில் வெளியான மரியான் படத்துக்கு முதலில் யு/ஏ சான்றிதழ் தரப்பட்டது. அவர்கள் மறுதணிக்கைக்கு அனுப்பியதும் யு சான்றிதழ் கிடைத்தது.
அதுபோல தலைவா படத்திற்கும் யு சான்றிதழ் கிடைக்கும் என்ற நம்பிக்கையில் காத்திருக்கிறார்கள் படக்குழுவினர்.