மங்காத்தா வெற்றியைத் தொடர்ந்து வெங்கட் பிரபு இயக்கி வரும் புதிய படம் பிரியாணி. இப்படத்தில் கார்த்தி, ஹன்சிகா மொத்வானி, பிரேம்ஜி அமரன் ஆகியோர் நடித்து வருகின்றனர். இப்படத்திற்கு யுவன் சங்கர் ராஜா இசையமைத்துள்ளார். இது இவர் இசையமைக்கும் 100வது படமாகும்.
யுவனின் 100வது படத்திற்கு மெருகூட்டும் விதமாக ஐந்து இசைமைப்பாளர்கள் ஒருங்கிணைந்து இப்படத்தில் ஒரு பாடலை அமைத்து இருக்கிறார்களாம். அதன்படி விஜய் அண்டனி, இமான், ஜீ.வி.பிரகாஷ், தமன் ஆகியோர் யுவனுடன் சேர்ந்து ஒரு பாடலை அமைத்து இருக்கிறார்கள்.
தமிழ் சினிமாவிலேயே முதன்முதலாக ஒரு பாடலுக்கு ஐந்து முன்னணி இசைமையப்பாளர்கள் ஒன்றாக இணைந்து ஒரு பாடலை அமைத்திருப்பது இதுவே முதல் முறையாகும். மேலும், இசைஞானி இளையராஜா குடும்பத்தில் இளையராஜா, கங்கை அமரன் ஆகியோரைத் தொடர்ந்து 100 படங்களுக்கு இசையமைத்த பெருமையும் இந்த படத்தின் மூலம் யுவனுக்கு கிடைத்துள்ளது.
இதுபோன்று இசையமைப்பாளர்கள் கூட்டு முயற்சியுடன் இணைந்து செயல்படுவது தமிழ் சினிமாவில் ஆரோக்கியமான சூழ்நிலையை உருவாக்கும் என சினிமா ஆர்வலர்கள் கருதுகின்றனர்.
